Zualko: Autralia ram ah a ummi Pi Abi Iang nih ruah lo tuk in a kan thih taak ee
Zual Ko: Australia Melbourne Nichuah Lei Ah Ngaihchiat Nak Kan Tong. Pi -ABi Iang (Van Nun Iang ) Kum – 27 , Apa – Pu Ram Cung (Zaangtlang), A Nu – Pi Za Ki (Sihmuh) Abi Iang hi 2019 ah khan student in a rak phan i Pasal le Fapa pakhat a ngeih hnu ah ruah lo pin zahan ah a kan liam taak hi si. Ngaihchiat nak a tổng mi
chungkhar sahlawh rualchan vial te nan ngaihchiat nak CBN nih kan in hrawm pi hna. Pumpak cio nan nun nak ah Bawipa Thiangthlarau tu nih tuar khawh nak he in hnem ko hna seh. Kan lung a faak in kan ngaih a chia tuk hringhran ee.
Kalay Sianghleirun Chung Um Non CDM Cachimtu Le Siangngakchia 140 Leng PDF Nih An Chanh Chuah Hna || 27 February 2024 Sagaing ramṭhen, Kalay Sianghleirun chung um mi Non-CDM cachimtu(saya/sayamah), Sianghleirun Chinram riantuantu le siangngakchia telh in minung 140 leng cu PDF nih an chanh chuah hna, tiah theih a si. Kalay Sianghleirun chung um SAC ralkap pawl cu nizan February 26 zing suimilam 5:00 hrawng in PDF nih kan kah hna. Kalay Siangleirun cu a dihlak in kan laa rih lo nain zatuak 70 kan laak cang. Sianghleirun chung um mi hna zong kan chanh chuah hna. Chanhchuah mi lakah Siangngakchia nu pawl le sianghleirun rianṭuantu chungkhar an tam bik, tiah PDF ralkap pakhat nih
People’s Spring ah a chim. Kalay Sianghleirun chung a um mi hi Non-CDM cachimtu (sayasayamah), Sianghleirun rianṭuantu, siangngakchia le zung rianṭuantu chungkhar hna an si i an dihlak minung 500 hrawng an um. Cu chung ah 140 leng PDF nih an chanh chuah khawh hna. Nizan February 26 kahdohnak ah Dah Kah Sah in SAC ralkap nih hriamngan in kahdohnak an tuah ruangah Khaikam khua innlo zong a rawk mi an um. SAC ralkap pawl cu Kalay Sianghleirun chung inn dot thum ah umhmun an khuar i vanlawng le hriamngan in kahdohnak an bawmh hna ruangah
PDF pawl cu hnu an kir, tiah theih a si. February 25 ah military region 1 nih thanhnak an rak tuah mi ah Kalaymyo hrambunh Dah Kah Sah kuttang SAC ralkap umnak Sekan, Kankyi le Kantharyar khua cu PDF ṭangṭi phu nih February 21-23 tiang an kah hnu ah an laak khawh, tiah an langhter. Cu kahdohnak ah cun SAC ralkap Captain telh in ralkap 15 an thi i, 10 hliamhma an pu. PDF lei in ralkap 2 nih an nunnak an pek ve. Meithal zun 10, RPG-7 zun 1, 60mm zun 1, bomb le meithal kuan tampi zong PDF nih an laak, tiah theih a si.
Hpakant Peng Um Tarmahkan Palik Sakhan Cu KIA Le KPDF Nih An Laak || 27 February 2024 Kachin ramkulh, Hpakant peng, Tarmahkan khua pawng SAC ralkap le an kuttang pawl nih umhmun an khuarnak palik sakhan cu Kachin ralkap KIA le KPDF ṭangṭi phu nih nizan February 26 ah luhhnawh in an kah i palik sakhan cu an laak khawh, tiah theih a si. “Nizan February 26, zanlei suimilam 4:30 ah KIA le KPDF ṭangṭi phu nih
Tarmahkan palik sakhan luhhnawh in an kah i zanlei suimilam 5:00 hrawng ah an laak khawh, SAC ralkap sakhan dang zong pehzulh in an kah” tiah KPDF in ṭuanvo ngei pakhat nih a chim. “Tarmahkan palik sakhan kahdohnak ah a thi mi SAC ralkap le hriamnam laak zat cu fehter a si rih lo i thawng fiang kan thanh ṭhan te lai,” tiah KPDF in ṭuanvo ngei pakhat nih cun a chim. KIA le KPDF ṭangṭi phu nih Hpakant peng chung Hwayhkar SAC ralkap sakhan cu tukum January 20 ni ah an rak laak i Nantein SAC ralkap sakhan zong a luancia February 2 ni ah an rak laak cang.