CDF Pasaltha hna nih SAC Ralhrang a hung zam mi minung 15 bak hriamnam he an tlaih khawh hna

CDF-Daai Nih Ralkap 15 An Tlaih Hna | 2024 February 1 — CDF-Daai nih ralkap Captain 1 telh in ralkap 15 cu CDF-Daai hmunhma chung, January 30 ah an tlaih hna tiah thawng an thanh. Ralkap Brigade 11 kuttang IB 217, 376, 538, 220, 219, 38, 587 le 908 hna in a zaam mi bo thum ralkap Captain 1, Bo 2 ralkap bawi 1 le

hlathlainak lei ralbawi 10 telh in ralkap 15 a zaam mi an tlaih hna hi a si. A zaam mi hna chung ah hliamhma fak ngai in a tuar mi ralkap 3 le adang hliamtuar ralkap 2 hna cu CDF-Daai nih an thlop hna i vawlei cung Geneva Convention phung ning tein an hren hna tiah theih a si.

CNDF, CDF-Mindat, ZFU Le MDF Cu CDF – Kanpetlet Nih An Fonh Hna || 1 February 2024 Chinram, Kanpetlet peng hrambunh Chin hriamtlai phu a si mi CDF-Kanpetlet Battalion 7 chung ah Battalion 5 nih raltuk le ramkhel lei ah Chin hriamtlai ṭangṭi phu a si mi CNDF, CDF Mindat, ZFU le MDF he kan ṭangṭi lai, tiah January 31 ah an thanh.  CDF Kanpetlet he ṭangṭi phu a si mi CNDF, CDF Mindat, PDF Zoland le MDF hna nih cun peng le khuate ah

hrambunh in Federal phung thar in Chinram cozah ser ding in le tlukruannak a um mi Federal policy a chuah khawh nakding kan i zuam cuahmah, tiah an langhter. Kanpetlet mipi pakhat nih ‘atu bantuk in CDF Kanpetlet Tatzibn 5 pawl hi Kanpetlet mipi zong tonbiaruah ta lo in statement a chuahmi an si, Kanpetlet mipi nih cun Chinland Council ah tel an duh a sinain hriamtlai nih anaa an ting bantuk a si tiah a chim. Chin hriamtlai phu unau thum cu a luancia 2023 December 30 ah Zomi Federal Union(ZFU/PDF-Zoland), Chin National Organization(CNO/CNDF) le Chin National Council (Mindat/CDF-Mindat) nih an rak dirh i MTC/MDF le CDF Kanpetlet nih an vun fonh ve hna.

Mrauk-U Hrambunh SAC Ralkap Sakhan Pakhat Cu Arakan Army (AA) Nih An Laak || 1 February 2024 Rakhine ramkulh, Mrauk-U peng ah hrambunh mi SAC ralkap Battalion Khah-Mah-Yah 540 sakhan cu Rakhine ralkap AA nih January 30, zan suimilam 11:45 ah an laak kong AA Information Center nih nizan January 31 zan ah an thanh. Rakhine miphun nih pupa ro tiah an sunhsak mi Mrauk-U khuapi ah SAC ralkap nih hriamngan in kahdohnak an tuah pin ah hramhram in ciam dihlak in khangh a timtu SAC ralkap Battalion 540, Battalion 377 le Battalion 378 hna cu voi khat kah ah

an kah hna kong AA nih an chim. AA nih SAC ralkap Battalion 540 sakhan cu a ningpi in an laak hnu ah a taang rih mi Mrauk-U SAC ralkap Battalion sakhan pahnih an kah pin ah sakhan dang zong pehzulh in an kah chap kong an langhter. Ralkap thazaang le hriamnam an chapnak Ramree khuapi le a kiangkap ah kahdohnak pehzulh a si. Nizan January 31 ni kahdohnak ah bawm ding in a kal mi SAC ralkap pawl cu AA nih an kah hna i SAC ralkap thi mi an tam pin ah hriamngan telh in hriamnam dang tam ngai an laak khawhnak kong zong AA nih cun an langhter chih. Kokang ralkap MNDAA le Ta’ang ralkap TNLA he ṭangṭi a si mi AA nih Chinram, Paletwa hmunram a ningpi le Rakhine ramkulh Pauktaw khuapi telh in SAC ralkap sakhan 100 leng an laak cang.

Breaking News! Pah-Kah-Phah Hriamtlai Phu Le CNO/CNDF Karlak Ah Kahdohnak A Chuak. January 31 | 2024 CNO/CNDF hna cu Kawlrawn lei khual an tlawnnak ah Kalay Pah-Kah-Pah hriamtlai phu hna nih an motor an rak kah hna i minung pakhat nunnak a liam, tiah theih a si. CNDF hna hi an GS telh in Khampat khua pawng Kanan khua lei Motor in

an kal lio ah NUG Kuttang PDF Phahkahphah nih an kah hna I, CNDF in Salai Bawi a thi I, a dang zong hliam an um tiah theih a si. Kalay Pah- Kah-Pah hriamtlai phu nih zeiruangah CNO/CNDF hi an kah hna timi thawng fiang theih a si rih lo.