Thawngpangthar: AA Rakhine pawl nih SAC Ralhrang Camp an laak hriamnam tam taktak an laakmi an langhter colh
Mrauk-U Hrambunh SAC Ralkap Sakhan Pakhat Cu Arakan Army (AA) Nih An Laak || 1 February 2024 Rakhine ramkulh, Mrauk-U peng ah hrambunh mi SAC ralkap Battalion Khah-Mah-Yah 540 sakhan cu Rakhine ralkap AA nih January 30, zan suimilam 11:45 ah an laak kong AA Information Center nih nizan January 31 zan ah an thanh. Rakhine miphun nih pupa ro tiah an sunhsak mi Mrauk-U khuapi ah SAC ralkap nih hriamngan in kahdohnak an tuah pin ah
hramhram in ciam dihlak in khangh a timtu SAC ralkap Battalion 540, Battalion 377 le Battalion 378 hna cu voi khat kah ah an kah hna kong AA nih an chim. AA nih SAC ralkap Battalion 540 sakhan cu a ningpi in an laak hnu ah a taang rih mi Mrauk-U SAC ralkap Battalion sakhan pahnih an kah pin ah sakhan dang zong pehzulh in an kah chap kong an langhter. Ralkap thazaang le hriamnam an chapnak Ramree khuapi le a kiangkap ah
kahdohnak pehzulh a si. Nizan January 31 ni kahdohnak ah bawm ding in a kal mi SAC ralkap pawl cu AA nih an kah hna i SAC ralkap thi mi an tam pin ah hriamngan telh in hriamnam dang tam ngai an laak khawhnak kong zong AA nih cun an langhter chih. Kokang ralkap MNDAA le Ta’ang ralkap TNLA he ṭangṭi a si mi AA nih Chinram, Paletwa hmunram a ningpi le Rakhine ramkulh Pauktaw khuapi telh in SAC ralkap sakhan 100 leng an laak cang.
Breaking News! Pah-Kah-Phah Hriamtlai Phu Le CNO/CNDF Karlak Ah Kahdohnak A Chuak. January 31 | 2024 CNO/CNDF hna cu Kawlrawn lei khual an tlawnnak ah Kalay Pah-Kah-Pah hriamtlai phu hna nih an motor an rak kah hna i minung pakhat nunnak a liam, tiah theih a si. CNDF hna hi an GS telh in Khampat khua pawng Kanan khua lei Motor in
an kal lio ah NUG Kuttang PDF Phahkahphah nih an kah hna I, CNDF in Salai Bawi a thi I, a dang zong hliam an um tiah theih a si. Kalay Pah- Kah-Pah hriamtlai phu nih zeiruangah CNO/CNDF hi an kah hna timi thawng fiang theih a si rih lo.
SAC nih Ralkap Uknak Caan Thla 6 an Chap Ṭhan January 31 Myanmar ram cu ralkap uknak tang ah thla 6 chung chiah rih ding in nihin January 31 ah SAC ralkap nih caan a sauh ṭhan, tiah thawng kan theih. SAC ralkap nih Myanmar rampi uknak an laaknak cu nihin Janauary 31 in kum 3 a tling i, hmailei ukhruainak kong he pehtlai in SAC nih National Defense and Secuirty Council (NDSC) meeting a tuah. Cu meeting ah cun
2008 Phunghrampi pohma 425 ning in ralkap uknak thla 6 kan sauh chap, tiah NDSC nih biachahnak a tuah. SAC nih Myanmar ram uknak an laak hnu in atutan hi NDSC nih ralkap uknak (State of Emergency) caan a voi 6nak a sauh a si cang. Nihin ah an tuah mi NDSC meeting ah SAC thim mi caankarlak President U Myint Shwe le Vice President Pu Henry Van Thio zong an kai, tiah BBC nih a langhter.