(Video+) SAC Ralhrang nih Hriamnam tam taktak le Miakpi pawl Mei in an kanghmi Video kan langhter

SAC ralhrang nih Yawchaung TOC an zaam taak. 122 MM howitzer miakpi hna tel in hriamnam kuanzen tampi an khangh taak January 27 || SAC ralkap nih Rakhine ramkulh, Myebon peng ah a um mi Yawchaung TOC camp an zaam taak i, cuka hmun le a kiangkap ah 122 MM howitzer miakpi tel in hriamnam kuanzen tampi an khangh taak, tiah Chaklei Unau Thum phu nih nizan January 26 ah an thanh. An cathanh ah, “Nihin January 26 zong ah

SAC ralhrang nih Myebon peng chung ah a um mi Tactical Operation Command – TOC umnak tlangbo pakhat an zaam taak than. SAC ralkap pawl nih 2024 January 26, zinglei ah Rakhine ram, Myebon peng chung ah a um mi Yawchaung TOC umnak tlangbo le a kiangkap camp ah 122 MM howitzer miakpi hna tel in

hriamnam kuanzen tampi an khangh,” tiah an langhter. TOC bo an zaam taak hnu in SAC ralhrang pawl cu ralkap tilawng in an zaam. AA ralkap pawl nih a zaam mi pawl cu dawi in an kah hna caah SAC ralkap a thi mi le hmapu an um tiah an tial.  Ni dang bantuk in January ni 26 zong ah Kyauktaw, Mrauk-U, Minbya, Rathedaung le Yanbye peng ah AA le SAC ralkap kar kahdonak pehtlai in a um tiah cathanh an an tial.

Chinland Council Hruaitu Meeting ah Chin Cozah Sernak Kong Khuakhan Lairelnak an Ngei January 27 || Chinland Council hruaitu hna a voi 2nak meeting cu January 25 in 26 tiang, nihnih chung an tuah i, Chin cozah sernak kong he pehtlai in khuakhan lairelnak an ngei, tiah thawng kan theih.  Cu ton biaruahnak ah cun Parliament of Chinland, Government of Chinland le Supreme Court of Chinland ser nakding ca ah timhtuahnak an ngei, tiah Chinland Council nih thawng an chuah.  Cu lawng si lo in Chinland Council a voi 2nak meeting tuah nakding kong he pehtlai in khuakhannak ngeih a si i,

Chinland Council ah luh ding in a sok mi chungtel thar hna kong le runvennak kong zong ceihhmainak ngeih a si, tiah Chinland Council nih a langhter chap. Chinland Council hruaitu hna a voi 1nak meeting cu December 11, 2023 ah khan Chinlung khua ah an rak tuah. Cu meeting ah cun phung sernak (Legislative), biaceihnak (Judiciary) le ukhruainak (Executive) ti mi tungtlang pathum sernak kong he pehtlai in khuakhan lairelnak an rak ngei.  December 4-7, 2023 ah Victoria Base ah tuah mi Chinland Council tonpumhnak ah Chinland Constitution (Chinram Phunghrampi) fehter a si i, Chinland Council zong phungning in dirh a rak a si.

Hakha Khuami Nu 1 Telh In Minung 3 Hna Cu SAC Ralhrang Nih Thih Hlan Lo Thong Thlak Ding Le Kum 7 Thong Thlak Dingin Bia An Khiahpiak Hna. January 25 | 2024 Chinram khualipi Hakha khuapi um tualchung mi nu 1 le pa 2 (an dihlak minung 3) hna cu SAC ralhrang nih thih hlan lo thong thlak ding le kum 7 chung thong thlak dingin bia an khiahpiak hna, tiah SAC ralhrang thawng zamhnak Fifty Two News nih January 25 ah thawng a thanh. Hakha khuapi um Pu Hram Nawl Thang cu tualchung hriamtlai phu hna ca ah tangka khawlh, Social Network ah tualchung hriamtlai phu hna thapeknak caṭial le SAC ralhrang an cawlcangh ning pawl cu

CDF hna sinah thawng a peek lengmang ruang ah Upadi Section 52(A) ningin rianhrang le kum 7 chung thong thlak dingin bia an khiahpiak, tiah an langhter. Cu bantuk ṭhiam in Hakha khuapi um Pu Ni Bawi Thang cu tualchung hriamtlai phu hna ei-din chanh, a puak kho mi thilri (Bomb le hriamthil) i chiah, tualchung hriamtlai phu hna rawl a chuanpiak hna i ṭuanvo a laak hna tiin an puh i Upadi Section 50(J), Section 51(c), Section 52(A) ningin thih hlan lo thong thlak ding ah bia an khiahpiak, tiah an langhter. Cu pinah Hakha khuapi um Nu Ni Hlei Sung cu tualchung hriamtlai phu hna ca ah

tangka khawlhpiak, amah pumpak in a bawmh hna, Messenger in tangka a khawlhpiak hna i, a bawmhchanh hna ruang ah Upadi Section 50(J) ningin thih hlan lo thong thlak dingah bia an khiahpiak, tiah SAC ralhrang thawng zamhnak Fifty Two News nihcun a chim. SAC ralhrang nih Martial Law an chuahnak nitlakchaklei hmunram chung ah sualnak a tuahtu hna cu SAC ralhrang biaceihzung ah biaceihpiak an si i sualnak a tuahtu minung 354 hna cu thok thlak dingin bia an khiahpiak hna, taih SAC ralhrang thawng zamhnak Fifty Two News nih a langhter chih.

Taingen Ah Tualchung Mi Pakhat Bomb Aa Lamhsual || 27 January 2024 Chinram, Tedim peng, Taingen khua ah nizan January 26 ah khan tualchung mi pakhat Pu Lai Pi(kum 40) hrawng cu bomb aa lamhsual ruangah a hliamhma a faak ngai i a ke khattelei an tan, tiah tualchung mi nih an chim.  Pu Lai Pi cu CNA le ṭangṭi phu hna nih an laakmi Taingen SAC ralkap sakhan va zoh dingin a kal lioah SAC ralkap nih an rak hmanh mi

bomb aa lamhsual, tiah theih a si. Chin ralkap nih Taingen sakhan an lak hnu ah sakhan cu tualchung mi tampi nih an va zoh cio i, Pu Lai Pi zong hi Taingen sakhan va zoh ding in a kal ve. Hau kulh lenglei ah kal lo ding in thawng an thanh ko nain Pu Lai Pi cu hau leng ah a chuak i bomb hi aa lamhsual, tiah min langhter a duh lomi pakhat nih a chim. Taingen sakhan cu CDF CDM Siyin phu nih hmunhma thianhhlimnak an tuah i sakhan kahdoh lioah CDF CDM Siyin ralkap pahnih bomb an rak i lamhsual ve i, an ke khattelei veve an tan hna, tiah theih a si.