Thawngpangthar: CNA, CDF-Hualngoram, CDF-Thantlang le People Defense Army hna nih SAC Ralhrang an kah lio ah khan

Thawngpangthar: india Ramri A Lonh Mi SAC Ralhrang 300 Leng Ralkap Council Sin Ah India Nih A Kuat Hna | 2024 January 11 — Chin ramkulh ah a cang mi kahdohnak pawl chung in India, Mizoram ah a zaam mi ralkap 359 cu Myanmar ram ah an kuat ṭhan cang hna tiah tualchung thawngzamh pawl cherhchan in Mizzima nih a langhter. India he ramri aa tlai mi Chin ramkulh ah 2023 November in 2024 January 2 tiang a czng mi kahdohnak voi 5 chung in ralkap an zaam hi a si i Assam Rifle nih an cohlan hna hnu ah an kuat ṭhan hna hi a si. 2023 November 12 ah India-Myanmar ramri, Rihkhawdar khua um ralkap sakhaan 2 cu CNA, CDF-Hualngoram, CDF-Thantlang le People Defense Army hna nih

an kah. Kahdohnak chung in ralkap lei 34 cu Mizoram, Champhai pengkomh, Zawkhuathar ah an zaam. Anmah pawl cu Assam Rifle nih India ralkap Helicopter in Mongnai khua in Tamu ah an kuat hna. November 15 ah Falam peng, Tibual ralkap sakhaan in ralkap 40 leng zong India ram ah an zaam. Mizoram, Tusentlang khua in Assam Rifle sin ah an i ap i cu hnu ah Myanmar ram, Tamu khua ah India ralkap Helicopter in an kuat ṭhan hna. 2023 November 19 ah Matupi peng, Lailenpi khua hrambunh LIB 304 ralkap sakhaan cu Chin dothlennak phu pawl nih an lak lio ah ralkap chungtel 30 cu Mizoram, Siaha pengkomh ah an zaam ṭhan. Anmah pawl zong India ralkap Helicopter nih

Myanmar ram ah an kuat ṭhan hna tiah ramri khuasa pawl nih Mizzima ah an chim. Paletwa peng, Myeik khuate pawng ah a um mi ralkap Point 377 sakhaan cu AA nih December 2 ah an kah hna i ralkap 15 cu Mizoram, Lawngtlai peng, Suisatlang khua in India ralkap sin ah an i dor. January 2 ah Lengpui vanlawng tual in ralkap Helicopter nih voi 2 an thir hna i Sittwe khua ah a kuat hna tiah All India Radio nih a thanh. Cun Paletwa khua, Chinletwa sakhaan cu AA le MDF nih January 2 ah an lak lio ah ralkap 104 cu Mizoram, Siaha pengkomh chung ah an rak zaam. January 9 ah ralkap vanlawng nih Aizawl khua, Lengpui vanlawng tual ah a rak lak hna. Mizzima nih a hlathlai khawh ning, thla 3 chung ah kahdohnak voi 5 a chuak i ralkap 135 cu India ram ah an zaam hna i an zapi in ralkap council sin ah an kuat ṭhan hna tiah a ṭial. Cubantuk in

ralkap kuat ṭhannak kong he pehtlai in “thazang a chanbau tuk cang mi ralkap nih an rak kuat ṭhan mi pawl kha dantat lo in ralram ah a kuat ṭhan hna lai. Ralkap thazang ca a si ṭhiam ko” tiah India for Myanmar hruaitu Salai Dokhar nih Mizzima ah a chim. India ram chung a rak phan mi kawl ralkap hna kha Myanmar ram ah hramhram in va kuat ṭhan lo in anmah duhning tein tawlrel piak ding a si tiah India for Myanmar nih India cozah sin ah ca an kuat. India in rak kuat mi ralkap pawl cu ralram ah an kalter ṭhan hna tiah hriamtlai phu nih Mizzima ah an chim.

Online Biahal Hmang Pawl nih Pu Solomon le Pu Htet Ni Limhang Nan Zorter Khawh Hna, RALRIN HAU-Ram dohthlennak tuah lio a si caah mipi thazaang a thawn ahcun kan ralkap an thazaang a thawng ve lai i an dirhmun a fek deuh deuh lai ti ruahchannak nganpi he Online siseh offline siseh phaisa kawlhol cuahmah lio caan a si. Abikin Online in mipi sinah phaisa kawlnak kongah langhter ka duhmi a um. Cucu zeidah a si- Kan ralkap bawizik Col.Solomon Thangding le CNA Spokesperson Htet Ni hna pahnih kong hi a si. Online ah biachim dingin nan sawm cecua hna, anmah pahnih biahal khawh aa zuam mi nan lo. Media bantuk dirhmun ngaingai zong si lem loin phaisa kawlnak phunphai caah nan hman hna. Anmah biachim thawngin phaisa tam deuh a chuak men ko hnga, Phaisa nakin a biapi deuhmi cu mi hmai ah

Limhang ngeihter, tihzah upatmi dirhmun ah um ter kha a si. Chinram ralkap bawizik le Spokesperson an sinak tal hi tihzah upat piak thiam u law a tha lo maw… Phaisa kawltu phu nan si ve tikah nan sawm hna tik ah el an in ngamh hna lo caah online ah an thut khi a tam lai dah. Ralrap bawizik hna hi atu le tu online in aukhuanter lengmang hi zeitindah nan sia tal a rem ka ti. Nan zaang hna an fak lo maw ti hi ka ruat. Mipi hmaiah atu le tu nan auter mi hna nih khin tamtuk an limhang a zorter kho. Mipi nih an bia ei tluk hnga zong in an ei kho ti hna lai lo i, mi phundang hrimhrim zong nih namnehnak tampi an nei khawh mi hna a si. A rauh deuh deuh tikah cun nanmah online biahal hmangmi pawl ruangah

Col. Solomon le Spokesperson Htet Ni hna khi Online bawizik le spokesperson tiah min an sak beh sual hna lai ti zong ruah pah hau. Pu Htet Ni cu CNA Spokesperson a si bantuk in thlakhat voikhat hna hi cu thawngpang update ngaih duh ah sawm ding a phu mi a si. Emergency ahcun thlakhat voihnih bantuk zong a phung si ko hnga. Nain Pu Col.Solomon hna cu online hrimhrim ahcun a si khawh chungin aukhuanter lo a tha bik. Mipi hmai ah vun langh ta duak a herh tukmi a um belte ahcun a can can te ah a mithmai hmu u sihlaw cu cu a za tuk. Online an tthut a tam tikah biahal a tam ve. Biahaltu hna zong hi media reporter professional ngaingai nan si lo tikah

hal awk a tha maw tha lo ti ruat lem loin ngaihnuam lomi tampi nan hal hna. ( Eg. Atu hi ralhrang motor 25 in Hakha lei an ra cuahmah, cucu zeitluk in dah CNA,CDFs nih timlamhnak nan ngeih?) Biahalnak asi tikah leh nan hau. Online biahaltu hna ruangah kan ralkap timlamhnak vialte ralhrang nih theih dih a fawi. Minung an si ve caah an chim tam deuh ahcun palhnak bia tete a chim kho ve mi asi. Cu caah Online in biahal a hmangmi pawl nih khan Pu Solomon le Pu Htet Ni hi cu hrial khawh i zuam deuh ko u, Limhang thuh zong hi thiam deuh ko u, lutlai hruaitu an sinak zong khi tihzah upat thiam deuh hram u. Za rih seh.. Crd: Ceuuk