Zoh nuam taktak lai: Laipa UFC Fighter Joshua Van le Brazil pa Filipe Bunes an i tthua cang lai a nithla kan langhter chih
Breaking : January 13, 2024 Ah UFC Fighter Joshua Van Aa Ṭhua Lai. 22 December 2023 Myanmar ram chuak lakah UFC fighter hmasa bik a si mi, Chin fighter Joshua Van cu 2024, January 13 ah aa ṭhuat ṭhan lai kong Joshua nih amah social media ah a taar. 2024 kum chung ah UFC puai hmasa bik UFC Vegas 84 cu January 13 ah thok a si lai i, hi tan ah hin Joshua cu aa ṭhua ve lai tinak a si. A ṭhuatpi ding hi UFC lei nih Media ah official in thanhnak an tuah rih lo nain
Brazillian ṭhuat thiam Filipe Bunes he an cuannak hmanthlak cu Joshua nih a taar. Joshua Van hi UFC ah vawi thum aa ṭhuatnak ding a si i, aa ṭhuat hmasa pahnih ah teinak a hmu veve cang. MMA aa celh vawi 10 ah vawi 9 teinak a hmu i, vawi khat a sung. Atutan MMA aa celhpi ding Filipe Bunes, kum 34 hi MMA aa celh vawi 19 ah vawi 13 teinak a hmu i, vawi 6 a sung cang. Tlaihkhih(BJJ) a thiam ngai mi a si.
Paletwa Peng Ah AA Nih Tualchung Mi An Phone Sim Card An Laakpiak Hna. 23 December 2023. Chin ramkulh, Paletwa peng ah AA nih tualchung mi hna cu an phone sim card an laakpiak hna, tiah theih a si. December 23 zinglei ah AA nih MPT sim card cu inn khat hnu inn khat lut in an chuh hna i zei ruang ah dah an laakpiak hna i an chuh hna ti cu hngalh a si lo. AA nih nihin December 23 ah Sami ralhrial telh in Michaung thluan ah a ummi khuate tampi ah
MPT sim card cu an chuh hna. A luancia November 15 lio zong ah Pichaung hmunram um khuate 10 leng ah tualchung mi hna hman mi MPT sim card cu AA nih an rak chuh cang hna i an pe ṭhan ti hna lo, tiah theih a si. Paletwa peng ah SAC ralkap nih ti lam le tlang lam vialte cu an kham dih leng ah AA nih i pehtlaihnak phone sim card an phih ve, tiah tualchung mi hna sinin theih a si.
CYMA Nih Myanmar Ralzaam Hna Cu Rupees Sing 4 Man Christmas Laksawng An Pek Hna The Chin Post || 22 December 2023 Mizoram ramkulh, Aizawl khuapi pawngkam ah a ummi Myanmar ralzaam hna cu CYMA nih ₹ 400,000(Rupees sing li) man hrawng Christmas laksawng cu tuzing ah an pek hna. Aizawl khuapi um CYMA zungpi Tuikhuahtlang ah laksawng phawtzamhnak hi an ngei i, Aizawl kiangkap um Durtlang, tuirial, Sairang, Sihhmui Dapchhuah, Khamrang le
Nghalchawm khua um ralzaam camp ah pariat i a ummi Myanmar ralzaam inndawng 188, milu 830 cu Facang, Chiti, Pe, Alu le Arti an pek hna. CYMA nih ralzaam an pekmi hna hi facang tun 68, pe tun 15, chiti bawm 38, alu tun 48 le arti bawm 25 a si i India phaisa sing 4 man hrawng a si. CYMA nih ralzaam Christmas laksawng ah an pekmi hna cu pick up (motor) 5 in ralzaam hna umnak ah an va pek hna. Pekchanhnak caan an ngeih lio ah CYMA President nih
Mizoram chung ah a rak zaammi Myanmar ralzaam hna bawmchan dingin CYMA committee nih biachahnak an rak tuah cang bantuk in christmas donnak ah laksawng tlawmte kan in pek ve hna i, kan in pekmi hna laksawng hi nan kan cohlan piak naklai kan in nawl hna, tiah a chim. Hi laksawng peknak ah hin Myanmar ralzaam bawmchantu Network for Unity Association (NUA) hruaitu hna nih an telpi hna i, ralzam aiawh in CYMA hruaitu hna cungah lawnhnak bia an chim.