Zualko: US ram a ummi Pi Tin Remh Iang nih tuan tuk in a kan thih taak ee

Zualko: a poi tuk ee US ram ah kan dawt tukmi nih a kan liam taak ee. Nulepa ulenau hna, Kan dawtmi Pi Tin Remh Iang nih a taantaakmi chungkhar tthutpinak le Ruak Thlahnak Program kan hun thanh tthan. Bawipa Daihnak nan cung ah um ko seh! US ram ah kan Laimi chan tim hlan ah a kan liam taak a tlawm ti lo e,

ruah lengmang ahhin ngaih a chia tuk ee. Tantaakmi chungkhar dihlak kan in ngaihchiatpi hna kan Biak Pathian nih in umpi hna in, in hnem ko hna sehlaw.

Hakha Khua Ah Datsi A Har Taktak Cang. 2023 December 11 — Chin ramkulh, Hakha khua ah Datsi rawn awk a har ngaingai cang tiah thawng theih a si. December 10 zaanlei thawk in datsi rawn awk a dih pah cang hi a si i Hakha khuarthar lei ah a um mi Aung Aung datsi dawr le Gangaw lei kalnak lam ah a um mi ထူးသစ်ဆန်း dawr hna cu December 10 zaanlei thawk in datsi rawn khawh a si ti lo. Cun, Matupi lam, Cawbuk lei kalnak ah a um mi datsi dawr pawl zong cheukhat cu

an khar cang hna i datsi a ngahnak hi dawr 2/3 lawng a um cang tiah theih a si. December 11 zinglei ah datsi, 92 hi gallon 1 ah 20,000MMK in cawk a si i 95 hi 25,000MMK in cawk a si. “Cawbuk lei kalnak datsi dawr pawl cu December 11 zinglei in i tlar cio a si. Minung pakhat nih gallon 1 cio hrawng in an cheuhnak hna dawr a um bantuk in pung aihre in aa cawk len mi zong an um. Datsi a rawng mi kan tam caah minung 1 nih tampi cawk lo in

i cheubauh cio ah a ṭha hnga, cheukhat cu khualtlawng le khualei a kir duh mi an um caah an zawn kan ruah pah hna a herh” tiah Hakha khuami pakhat nih The Chinland Post ah a chim. Atu bantuk in Datsi a dih thluahmah nak a ruang hi Kalay-Hakha lam ah a pih bantuk in Mandalay-Gangaw-Hakha lam zong a pih caah a si i zei can dik lam a pih rih lai cu theih a si lo tiah Hakha khuami hna sin in thawng theih a si.

Chaklei Hriamtlai Phu Unau Thum He Tonbiaruahnak Kan Ngei – Zaw Min Thun. 11 December 2023 Atu lio dohthlennak he pehtlai in kahdohnak kong ah chaklei hriamtlai phu unau thum he tonbiaruahnak an ngeihnak kong cu SAC chimnak nawlngei Zaw Min Thun le China Foreign Ministry in chimnak nawlngei Mao Ning nih nihin December 11 ah an chim. China Foreign Ministry in chimnak nawlngeitu nih chaklei hriamtlai phu thum le SAC kaphnih kar tonbiaruahnak an ngeihmi a phichuak cu

a ṭha ngaingai, tiah a chim nain zeibantuk phichuak dah a si ti belte cu a chim chih lo. Atu bantuk kaphnih kar hnatlaknak he tonbiaruahnak an ngeihmi cu lunglawmh awk ngai a si i China cozah zong nih pehzulh in kan bawmh ko hna lai, tiah a chim chap. SAC chimnak nawlngei Zaw Min Thun zong nih cun, “China cozah bawmhnak thawng in chaklei hriamtlai phu thum he tonbiaruahnak kan ngei kho. A ralaimi December thla dongh ah

kaphnih kar tonbiaruahnak ngeih ṭhan kan i tim i ramkhel phunglam he kahdaihnak kong ceihkhan ṭhan ding in timhlamhnak kan ngei,” tiah a chim ve. Chaklei hriamtlai phu unau thum a simi Rakhine ralkap AA, Ta’ang ralkap TNLA le MNDAA lei nih cun SAC he tonbiaruahnak kong ah thanhnak zeihmanh an tuah rih lo.