Zualko: Malaysia ram ah Pu Thiang Za Bik nih ruah lo tuk in a kan thih taak ee

Thih Dar… 30/11/2023 zinglei ah, Pu Thiang Za Bik, Hmawngtlang khua mi nih, Pawfah nak in mual a kan liam tak. Tantak mi chungkhar an ngaihchiatnak vialte, Bawipa tunih a thar in hnemthan ko hna seh.  Ngaihchiatnak he pehtlai mi, thawngthanhnak. Thaizing zaan ah ZZLMS programe hmangin kan Biakinn Zophei Christian Fellowship ah

thutpinak kan ngei rih hna lai. Ahmun : Zophei Christian Fellowship KL Malaysia. Acaan : 8 pm. Ruak vuinak kong. Zarhteni ( Saturday December 2, 2023 ah Suimilam 11am ah kan Biakinn  Zophei Christian Fellowship KL Malaysia ah, tonnak ngeih in kal si telai ruak thlahnak lei ah.

Matupi-Mindat Laemyu Lam SAC Ralkap Kakinkone Sakhan Kahdohnak Ah Ralbawi Pakhat Telh In Ralkap 7 An Thi. 1 November 2023 Chin ramkulh, Matupi khuapi, Matupi-Mindat Laemyu Lam um SAC ralkap Kakinkone sakhan cu nihin December 1, zinglei suimilam 9:00 hrawng ah CDF-Matupi nih an kah, tiah theih a si. Kakinkone sakhan kahdohnak ah cun

SAC ralkap lei in ralbawi Pyu Min Htet telh in ralkap 7 an thi i MA-3 2, MA-5 Pistol 1 zong an laak khawh, tiah theih a si. CDF-Matupi lei in hliampu um lo tein hnu an tolh khawhnak kong cu nihin December 1, zanlei ah an cathanh chuahmi ah an langhter.

Konkyan Khuapi Hrambunh 125th Infantry Battalion Ralkap 272 Cu An Battalion Ningpi In Thandar Raang Thlir In Hriamnam Tampi He A Sung An Pek. December 1, 2023 — Chaklei Shan ramkulh Laukkai Regional Operations Commands (ROC) Da-Kah-Sah kuttang Konkyan khuapi hrambunh 125 th Infantry Battalion ralkap 272 cu an Battalion ningpi in thandar a raang thlir in an hriamnam he November 28 ah chaklei unau hawikom phu 3 sin ah an lut, tiah MNDAA chimnak nawlngei Ly Kyarwen nih Khit Thit Media ah a chim. Operations 1027 an tuahnak ni 33 a tlin ni November 28 ah Kokang peng Konkyan hrambunh SAC ralkap pawl cu thandar raang thlir in a sungpe mi chung ah Kaw miphun pyithusit 27, LIB 125 in ralkap 93, MOC 16 in ralkap 36, MOC 12 in

ralkap 14, ralkap chungkhar 86, kahdohnak lei ruahnak petu 5 le palek 11 hna tiah an zapi 272 an si, LIB 125 ah Helicopter vanlawng tual le drone thahnak special Jammer zong a um chih tiah MNDAA sin in theih a si. Thil sining cu an Battalion Commander nih adang ralkap pakhat he MNDAA sin ah rak i fonh ding in nawl a hal hna i hliam a tuar mi ralkap pawl thlop piak ding le an chungkhar pawl umnak tawlrel piak ding in bawmhnak a rak hal hna i MNDAA lei nih an lungtlin pi caah November 28 zanlei 4:00pm ah battalion commander hruainak in LIB 125 chungtel an zapi an rak i fonhnak hi a si i ralkap MOC commander nih adang ralkap 100 leng cu November 27 ah a zaampi. “Hriamnam a tam tuk, hriamngan-miakpi, kuan le zen, a tam, battalion chung in

voi tam tuk lak le chuahpi a hau, zeizah set a si hi MNDAA nih cazin a langhter hnu ah theih a si te lai, ka theih tawk ahcun kuan le zen hi tlang bantuk in aa pawng ko, hriamnam chiahnak kudong chung vialte lak a si ko” tiah MNDAA he tangti mipi ralkap PDF hna nih an chim tiah Khit Thit sin ah an chim. Atu bantukin Battalion ningpi in hriamnam an chiah hi a voi hnihnak a si i, a luancia November 12 ni ah Laukkai Regional Operations Commands (ROC) Da-Kah-Sah kuttang 129 th Infantry Battalion in Commander Major Kyaw Ye Aung hruaimi ralkap 126, an chungkhar minung 134, an zate minung 262 zong MNDAA sin ah a sungpek in an rak lut bal cang tiah theih a si.

Aizawl Thonginn In Nu Pathum An Zaam I Tuzing Tiang Tlaih An Si Rih Lo. 1 December 2023 Mizoram, khualipi Aizawl nu thonginn(Women Central Jail) chung in thongtla nu pathum cu November 30 zinglei ah thonginn chung in an zaam i thawng kan ṭial tiang ah tlaih an si rih lo.  Thonginn in a zaammi hna hi Tuirial khua mi Lalchhanmawii, Aizawl Thuampui sang khuasa mi Lalruatsangi le Churanchandpur (Manipur) mi Niengboi hna an si i

annih pathum hi November 30 zinglei suimilam 1 -2 karah thonginn vampang ah kai in an zaam, tiah Mizoram media nih an langhter.  Thonginn in a zaammi nu pathum hi rithaisii case in thong a tlami an si i thonginn puan pawl cu an peh i vampang ah kainak ah an hman. December 1 tiang palik nih an tlai kho rih hna lo, tiah theih a si.

SAC Ralkap Nih Mindat Khua Ah Inn An Khangh. 1 December 2023 Chin ramkulh, Mindat khuachung ah SAC ralkap nih inn an khangh, tiah theih a si. Hriamngan le hriamhme thawng zong pehtlai in a thang i, kaphnih kar kahdohnak pehzulh in a chuak sual lai ti phan ah tualchung mi hna cu zaam ding in timhlamhnak an ngei, tiah Mindat tualchung mi nih

The Mindat Post ah an chim. A luancia zarh chung zong ah SAC ralkap nih Mindat khuachung ah hriamngan pehtlai in a thlah, tiah theih a si. Tualchung hriamtlai phu le SAC ralkap kar kahdohnak fak a chuak khomi a si caah ralring tein um an herhnak kong zong tualchung mi hna nih cun an chim.