Thawngpangthar: Mizoram Aizawl ah Riithai sii a phurmi minung 3 bak an zaam kho ee

Aizawl Thonginn In Nu Pathum An Zaam I Tuzing Tiang Tlaih An Si Rih Lo. 1 December 2023 Mizoram, khualipi Aizawl nu thonginn(Women Central Jail) chung in thongtla nu pathum cu November 30 zinglei ah thonginn chung in an zaam i thawng kan ṭial tiang ah tlaih an si rih lo.  Thonginn in a zaammi hna hi Tuirial khua mi Lalchhanmawii, Aizawl Thuampui sang khuasa mi Lalruatsangi le Churanchandpur (Manipur) mi Niengboi hna an si i annih pathum hi

November 30 zinglei suimilam 1 -2 karah thonginn vampang ah kai in an zaam, tiah Mizoram media nih an langhter.  Thonginn in a zaammi nu pathum hi rithaisii case in thong a tlami an si i thonginn puan pawl cu an peh i vampang ah kainak ah an hman. December 1 tiang palik nih an tlai kho rih hna lo, tiah theih a si.

SAC Ralkap Nih Mindat Khua Ah Inn An Khangh. 1 December 2023 Chin ramkulh, Mindat khuachung ah SAC ralkap nih inn an khangh, tiah theih a si. Hriamngan le hriamhme thawng zong pehtlai in a thang i, kaphnih kar kahdohnak pehzulh in a chuak sual lai ti phan ah tualchung mi hna cu zaam ding in

timhlamhnak an ngei, tiah Mindat tualchung mi nih The Mindat Post ah an chim. A luancia zarh chung zong ah SAC ralkap nih Mindat khuachung ah hriamngan pehtlai in a thlah, tiah theih a si. Tualchung hriamtlai phu le SAC ralkap kar kahdohnak fak a chuak khomi a si caah ralring tein um an herhnak kong zong tualchung mi hna nih cun an chim.

RCSS Le SSPP Cu Phungning Tein Kahdaihnak An Tuah Cang. 30 November 2023 Shan mizapi le phungki hna saduhthah ning tein Shan State Progress Party/Shan State Army(SSPP/SSA) le Restoration Council of Shan State(RCSS) hriamtlai phu hna cu November 19 ah kahdaih hnatlaknak an tuah khawh cang, tiah theih a si.  November 19 ah SSPP headquarter in aiawhtu minung 3 le RCSS headquarter in aiawhtu minung 4 hna cu tonbiaruahnak le ceihmainak an ngeih dih hnu ah kahdaih hnatlaknak an ngei, tiah theih a si.  SSPP le RCSS hriamtlai phu hna hi shan ramkulh chung ah

an um i caan saupi aa tu pengmi an si. Atu bantukin kahdaih hnatlaknak an tuah khawhmi hi Shan mizapi le phungki hna nih an rak i hngahhlang tukmi a si.  Cu pinah August 9 le 10 ah kap hnih Chairman nih nawlpeknak cathanh an rak chuahmi ah kahdaihnak ngol ding, khat le khat karah miphun a hnorsuang khotu thil cu media hmang in khamnak tuah ding kan rak timi zong nihin tiang kan zulh, tiah kap hnih in thanhnak an tuahmi ah an langhter.  SSPP le RCSS hriamtlai phu hna cu 2018 kum in an rak i kap cang i, kap hnih in kahdaihnak tuah ding cu 2023 August thla ah kaphnih hruaitu hna nih biakhiahnak le nawl peknak an rak tuah, tiah theih a si.

Chin Ralkap Nih Khuapi 7 An Lak Cang, Ram Pumpi Ah Chin Miphun Kan Mithmai A Hngal. Kawlram ah hriamtlaibu tampi an um i cu chungah Chin hriamtlaibu cu thazang a tlawm lei kan rak si. Asinain khuapau dohthlennak a chuah hnuin mino tampi hriam an tlai. Ramleng in chawva tampi kan bawm hna. Cuticun minung thazang in siseh hriamnam thazang in siseh kan ṭhawng chin lengmang. Thiamnak lei zongah tampi kan ṭhangcho.  Atu ah cun MAH nih

“CNA cu hriamtlai ti tlak hmanh an si lo” tiah zeirel lo ngai in a rak chim mi cu aa lungretheihpi mi hriamtlai ah a cang. 1027 a chuah hnuin MNDAA, TNLA le AA nih Kokang hmunram ah SAC sakhan 200 dengmang an lak cang i khuapi (myo) 7 an lak hna. Sagaing ramṭhen ah khuapi 3 an lak, cu hna cu Kawlin, Khampat le Shwe Pyi Aye hna an si. Cun Karenni ah Meseh khuapi an lak ve. CNA hruainak in Chin hriamtlai hna nih biatak tein kahdohnak an vun tuah i caan tawite chung ah khuapi (myo) 7 an lak. Kan thazang, kan hriamnam le caan tuak tikah Chin ralkap hna nih khuapi 7 an lak khawh mi cu

a sunglawi taktak khi a si. Kan zapi kan ṭanrualnak thawngin Kawl miphun le miphun dang hna lakah Chin miphun kan mithmai a hngal ve cang. Pathian le kan ralkap hna thawngin a si. Pathian nih kan Chin ralkap hna hmang in teinak lei ah a kan hruai cuahmah. Ramleng mipi zong tangka thawh i zuam chin ko usih.  Chin ralkap hna nih atu tiang an lak cang mi khuapi hna cu Hnaring, Surkhua, Makuinu, Weibulak, Rihkhawdar, Lailenpi le Rezua hna an si. Hmanthlak: Lailenpi, Rezua le Rihkhawdar