Israel kahdohnak thawngpangthar; ISRAEL ralkap hna nih Hamas Ralhrang umnak hmun khuar an hmuh khawh ee

Hamas nih Gaza Sizungpi tangah camp an chiah. Israel nih biatak tein Gaza a um mi Sizungpi pawngkam ah kahdohnak a tuah hnu in vawlei cung ram hna nih an mawh chiat i, International phunglam ning in Israel nih a cawlcangh awk a si tiah UK Prime Minister Rishi Sunak zong nih a chim ve cang. US President Jose Biden zong nih Al-Shifa Sizung hi ven hrimhrim ding a si tiah Israel nih kahdohnak a tuah mi kong he pehtlaiin a chim ve. Asinain a hnu deuh ah

US National Security biaphuang John Kirby nih cun Hamas pawl nih Al-Shifa Sizungpi tang ah camp an chiah. Cu camp cu hriamnam chiahnak le raldohnak ah an hman tiah a langhter. Asinain Hamas nih cun lih le hrokhrol rumro a si tiah a leh colh ve. IDF biaphuangtu Daniel Hagari zong amah pumpak bak in Gaza ah a um mi Hamas nih an cawh kua pakhat a va zoh. Cu leitang kua cu Gaza ah a um mi Hngakchia Sizung tangah a va chuak tiah zumh a si i

Hamas nih cu Hngakchia Sizung cu i thuhnak le hriamnam chiahnak ah an hman tiah an langhter. Yemen ram ah a um mi Houti ralhrang nih cun November 14 ni ah Israel ram ah Missile le Drone kan kah tiah a langhter. Asinain rili thi a phak ah tla bak in Israel nih a rak kah piak caah Israel ram ah a lut manh lo. IDF nih cun Hamas nih Gaza an uk kho ti lo tiah a chim hnu zong ah Hamas pawl cu a kawl bak in an kawl cang hna i kahdohnak an tuah cuahmah ko rih tiah IDF nih an langhter.

Kutkai le Tangyan Ah A Um Mi Ralkap Le Pyithusit Sakhaan 3 TNLA Nih An Lak. 2023 November 15 — Shan ram, Kutkai pengle Tangyan peng ah a um mi ralkap le pyithusit sakhaan 3 cu TNLA nih an lak tiah TNLA nih an thanh. November 10 zaan sml 12:00am hrawng ah Kutkai peng ah a um mi ralkap kuttang pyithusit sakhaan cu TNLA nih an lak, November 14 zinglei sml 4:00am hrawng ah Kutkai peng, Lwaikan khua pawng ah a um mi ralkap le pyithusit sakhaan cu

TNLA nih an lak chap i sakhaan chung um kahdohnak thilri pawl zong an lak khawh tiah theih a si. Cubantuk in November 14 ah Tangyan peng ah a um mi ralkap ralkap Sai-Hlian sakhaan zong TNLA nih an lak. November 14 ah Kutkai peng ah a um mi ralkap kuttang Mon-hyun pyithusit phu le Monpaw pyithusit phu hna cu TNLA sin ah hriam zuun 10 an rak ap. Cun November 15 zinglei sml 5:00am hrawng ah Kyaukme peng, Naungpyit khua lamṭhen ah ralkap le TNLA hna karlak ah kahdohnak a fak tiah theih a si.

Kokang Hmunram Ah MNDAA Nih SAC Ralkap Sakhan 3 An Laak Chap, Sakhan 147 An Laak Cang. 15 November 2023 Shan ramkulh chaklei Kokang hmunram ah MNDAA nih SAC ralkap sakhan 3 an laak chap, sakhan 147 an laak khawh cang. Cu sakhan laak kahdohnak ah cun SAC ralkap 20 nak tlawm lo an thi, tiah theih a si. Nihin November 15, zinglei suimilam 6:30 ah MNDAA nih Shaukchonekan, Mawtite Saikyaukshan le Mawtite Talinkae tlang SAC ralkap sakhan 3 cu

an laak khawh i sakhan zate 147 an laak khawh cang, tiah theih a si. Nizan November 14 zong ah MNDAA nih Kokang hmunram SAC ralkap sakhan 2 an laak chap i sakhan laak kahdohnak ah SAC ralkap thi le hliam zate 50 leng an si i hriamnam zeimawzat zong an laak khawh. “Nihin November 15, Kokang hmunram sakhan laak kahdohnak ah SAC ralkap 20 leng an thi i hriamnam tam ngai kan laak khawh,” tiah MNDAA ral hmaikal ṭuanvo ngei pakhat nih a chim

Ta-moe-nge Ah A Um Mi Ralkap LIB 123 Sakhaan KIA Nih AN Lak, Ralkap Lei 50 Reng Lo An Thi. 2023 November 15 – Shan ram, Kutkai peng, Ta-moe-nge khua ah a um mi ralkap LIB 123 sakhaan cu KIA nih an lak tiah KIA thawngzamhnak nih a thanh. November 12 ah Ta-moe-nge khua, Ka-ta-nai sakhaan khua ah

hram a bunh mi ralkap LIB 123 sakhaan cu KIA Brigade 6 nih an kah i sakhaan an lak beh hi a si. Cu sakhaan cu November 13 ah an lak khawh i ralkap lei 50 reng lo an thi, hriam tampi zong an lak khawh tiah theih a si.

Tibual Sakhan In SAC Ralkap 29 Mizoram Lei Ah An Zaam Ṭhan!. 15 Nov 2023 CNDF nih Tibual SAC Sakhan an laak hnu in SAC ralkap 29 cu Mizoram lei ah an lut ṭhan, tiah All India Radio News nih a ṭial.  SAC ralkap 29 hna nih hin Assam rifle kut ah i pek an i tim, tiah an chim. Dungtlang Police station in a chuakmi Mizoram palik nih SAC ralkap pawl hi Saikhumphai pawngah va don i, Assam rifle sinah ap ding in timhlamhnak an ngei. SAC ralkap 29 dong ding in

Mizoram Palik, Assam rifle, YMA le Vaphai VC hna cu Saikhumphai lei ah an kal, tiah AIR nih a ṭial. Tibual kahdohnak ruangah tualchung mi 600 hrawng cu Mizoram lei ah an zaam i, ralzaam hi an karh lai tiah an zumh kong Vaphai khuatlang hruaitu nih an chim. Kan rak theih cang bantuk in Rih le Ṭiau sakhan in a zaam mi SAC ralkap 43 cu Mizoram ah lut in Assam rifle sin ah an rak i pe i, Myanmar lei ah Indian Air Force helicopter in phorh an rak si cang.