Thawngpangthar: Shan ram chaklei ah SAC Ralhrang Camp 80 cu kan pasaltha hna nih an laak khawh kong an phuan

Shan Ram Chaklei Ah SAC Ralkap Sakhaan 80 Hrawng An Lak Khawh Cang. 2023 October 31 — Shan ram thlanglei ah ni 4 chung a rau cang mi Operation 1027 chung ah SAC ralkap sakhaan 80 hrawng an lak khawh cang tiah unau hawikom phu (MNDAA, TNLA, AA) nih thawng an thanh. October 30, nikhat chung lawng ah

Shan ram chaklei um SAC ralkap sakhaan 13 an lak khawh i SAC ralkap hriam le kuanzen tampi zong an lak khawh, Theinni GAD zungpi zong an lak khawh leng ah Theinni khua luhnak Namato hlei zong an hrawh khawh. Nihin tiang ah SAC ralkap sakhaan 80 hrawng an lak khawh cang tiah theih a si.

A poi tuk ee. Mindat-Matupi Lampi Ah Motor Pakhat Aa Let I Minung 2 An Thi. 31 October 2023 Chin ramkulh, Mindat-Matupi lampi meng 56 aa hlatnak ah October 29 ni ah motor pakhat aa let i minung pahnih nunnak a liam, tiah theih a si. Pakkoku khua in a rak i thawhmi Kyaukhtu ah thilphur in

Matupi lei ah a rak kaimi motor pakhat cu lampi ah aa let i driver le a zultu pakhat cu a hmun ah an thi colh, motor ngeitu cu hliam fak tuk lo in aa hliam, tiah motor lehnak a cannak khua kiangkap ummi nih an chim. Motor lehnak in a thimi le aa hliammi konglam theih a si rih lo. October 29 ni motor aa lehnak pawngkam ah motor pakhat zong a rak i let bal, tiah Zalen nih a ṭial.

CNF/CNA nih a phuan ve cang: MNDAA, TNLA, AA Hna He Aa Ruang Tein Kahdohnak Tuah Ding In CNF Nih Forhfialnak A Thanh 2023 October 31 — Shan ram chaklei ah an kalpi cuahmah mi Operation 1027 he aa ruang tein kahdohnak tuah hna usih tiah CNF nih cathanh a chuah. Unau hawikom phu (MNDAA, TNLA, AA) nih mipi an i ruahchan mi hramhram uknak a hram in hrawh khawh nakhnga mipi innlo, thilri mansung, mah hmunhma te uk khawh nak, SAC vanlei kahdohnak kham khawh nak, online in

mihlen hmang pawl hrawh khawh nakhnga tiah SAC ralkap le pyithusit pawl an ṭhawl khawh nakhnga Operation 1027 an tuah mi cu kan hnatlak pi tiah cathanh ah an langhter. October 27 in unau hawikom phu nih an thawk mi Operation 1027 chung ah SAC ralkap sakhaan tampi le hriam, kuanzen tampi an lak khawh i teinak an hmuh thluahmah mi cung ah

kan lunglawmh pi i teinak thandar a thlir khawh nakhnga saduhthahnak nganpi kan ngei ve tiah cathanh ah an ṭial. SAC nih hramhram in uknak a lak mi hi hramhram uknak a hram in hrawh khawh nakhnga le tlangcung miphun vialte nih kan i ruahchan mi ramkhel phung sernak caah kan hmuh bal lo mi caan ṭha bik a si caah hi bantuk caan ṭha hi ṭha te’n hmang in unau hawikom phu he aa ruang tein kahdohnak tuah hna usih tiah forhfialnak cathanh a chuah.

SAC Nih Thantlang Khua Kan Uk Khawh Dih Cang Tiah Thawng A Thlah Mi Cu Lihhrawkhrawl A Si Tiah CNF Nih A Leh Colh. 2023 October 31 — Thantlang khua kan uk khawh dih cang tiah SAC nih thawng a thlah mi hi lihhrawkhrawl a si tiah CNF nih bialehnak a tuah. October 30 ah SAC nih Thantlang khua cu kan uk khawh dih cang tiah thawng a rak thlah. “Thantlang khua ah zeibantuk kahdohnak hmanh a um lo bantuk in SAC ralkap he

kanmah CDF, CNA he hmunhma kan la veve rih ko. Thantlang khua ah kahdohnak a chuah lo nak hi zarh 2/3 a si cang. Anmah nih hmunhma 3/4 ah hmunhma an khuar bantuk in kanmah lei zong nih hmun 3/4 ah hmunhma kan khuar ve. Ahlan bantuk tein a si ko” tiah CNF chimphuannak nawl a ngeitu Salai Htet Ni nih Khonumthung Burmese ah a chim. SAC nih thawng dik lo a thlah hnu caan tlawmpal ah CNF nih bialehnak an tuah ve hi a si. SAC nih

vanlei kahdohnak, mipi innlo khanghnak, hriamngan kahnak pawl ruang ah Thantlang khua mipi inn thong tampi a ciam, cubantuk thil pawl cu mipi hriamtlai phu pawl nih an tuah mi a si tiah SAC ralkap nih lihhrawkhrawl in a puh hna. Thantlang khua uk kho ding in mipi hriamtlai phu le SAC ralkap hna cu khuachung ah hmunhma an khuar cio i kahdohnak a chuak lengmang fawn. Hmanthlak – SAC nih lihhrawkhrawl a thlah mi thil sining pawl