Ttihnung tuk cang: Israel ralkap nih Gaza ah a um mi Hamas hna umnak cu zahan zaan ah an va luh hnawh tthan hna caah kahdohnak a zual chin lengmang

Israel nih Hamas ralkap bu pakhat i commander an thah. Israel ralkap nih Gaza ah a um mi Hamas hna umnak cu zahan zaan ah an va luh hnawh tthan hna caah Hamas ralkap bu pakhat i an commander pa kan thah tiah IDF nih an langhter. Hamas ralkap bu pakhat a si mi West Khan Younis battalion i an commander Midhat Mabasher cu kan ralkap hna nih cawn nili ni zaan ah an va thah tiah an langhter. Israel ralkap hna cu a voi hnihnak Gaza ah lut in operation an va tuahnak a si i, Israel ram ah rocket a kaptu phu in

an commander pa an va thah hi a si. Hi kong he pehtlaiin Hamas lei nih zeihmanh chim mi an ngei rih lo. Gaza ah kahdaihnak a um lo ahcun kan tlaih mi hna hi kan thlah kho hna lo tiah Hamas nih an chim tiin Russia News paper pakhat nih a langhter. Hamas nih an tlaih mi hna hi minung 229 an si. Zatceonak tam cu ram dang mi sinak a ngeitu lawngte an si hna, cu hna lak ahcun Thailand ram mi sinak a ngei mi ko an tam tiah Israel nih an langhter. UN nih cun Israel nih Gaza a kah ruang i inn a cim mi nih

a nenh mi hi minung 1000 tluk an um lai tiah zumh a si tiin a langhter. Cu hna pawl cu aho si theih khawh an si rih lo hlei ah tutiang kahdohnak ah a thimi cazin zong ah khumh an si lo tiah UN nih cun a langhter. Israel le Hamas an buai hnu ah Iran nih cun US ralkap le a minung pawl rumro a rak i ngiat ve hna i rocket hna i a rak kah ve hna. Cucaah tuzing ah US nih cun Syria ram i a um mi Iran nih a bawmh mi ralkap hna camp ah Vanlawng in bomb a va thlak tiah Pentagon nih a langhter

Zualko: Pu Khai Za Lian nih Hakha siizung ah mual an kan liam tak! Pu Khai Za Lian hi Thantlang ah JMBC member an si! Atu hi HBC ah chungtel an si. Thantlang voikhatnak kahdohnak lio ah an fapa Van Bawi Thang( K.10) nih mual a kan liam tak! Thantlang ah an um ngam ti lo caah Hakha ah an rak zaam ve! Atu bantuk in chungkhar pa bik nih

mual a liamtak hna tikah lung a fak khun! Pathian nih ngaihchiatnak a tuarmi chungkhar hna intuar khawhnak pe ko hna seh! Atu hi zan 6 hnu a si caah siizung in lawipi awk a that ti lo caah siizung chapal ah an um lio a si! Ruak tha tein an i suan i an vuikhawhnak hnga thlacampiak cio hna usih! RIP Nempi pa.

Tonzang Peng Ah India Lei In A Rami Hriamtlai Phu Khat Cu CDF-Tonzang Nih An Kah Hna. 27 October 2023 Chin ramkulh, Tonzang peng, CDF-Tonzang Battallion nih an ukmi hmunram Thansi khua le Santone khua hna ah India lei in a rami Chin Kuki Liberation Army(CKLA) cu an kah hna, tiah theih a si. CKLA hriamtlai phu cu CDF-Tonzang hmunram cheukhat ah khualtlawng mi, meithal he tlerhkhawnh in tangka hal, thilri laakpiak a hmangmi phu an si i khuate hna ah tualchung mi hrocer in phaisa hal an hman ruang ah

CDF-Tonzang Battalion 1 le 2 nih an kah hna, tiah CDF-Tonzang Battalion-2 nih October 26 ah an thanh. CDF-Tonzang Battalion 1 le 2 nih an kah hna caah CKLA phu cu an zaam dih i minung 3 cu India ralkap nih an tlaih hna, a dang cu Manipur tiva lei ah an zaam i minung tam ngai hliam an pu, tiah an thanhmi ah cun an langhter. CDF-Tonzang nih an langhter ning ah; CKLA hriamtlai phu cu India ram mi Ngam Cha le Ja Mon hruaimi phu a si i a luancia 2023 March 24, zan suimilam 10:00 hrawng ah

Tonzang peng Phaisat khua ah lut in tualchung mi cu phaisa zong an rak chuh bal hna, tiah theih a si. CKLA hriamtlai phu cu India-Myanmar ramri hrawng ah hrambunh in a ummi phu an si, tiah naihniam in a ummi nih an chim. Kuki miphun aiawh in hriam a tlaimi phu cu Kuki National Organization/Kuki National Army phu khat lawng an si i Kuki min pu in hriam a tlaimi phu dang cu Kuki miphun aiawhtu phu an si lo, tiah tualchung hriamtlai phu le Kuki mipi hna nih an chim.

Kawkareik khuapi SAC ralkap an kah hna. Karen ram Kawkareik khuapi ah a um mi SAC ralkap hna cu KNU le PDF fonh nih an va kah hna tiah theih a si. Kawkareik khuapi chung ah a um mi Khah Lah Yah 97 ralkap bu tuzing arkhuang sml 5 hrawng ah KNU le PDF nih an va fuh hna i kaphnih karlak kahdohnak a chuak. Hi bantuk in Kawkareik khuapi kahdohnak ruang ah SAC ralkap le BGF hna nih cun heh tiah Myawaddy khuapi ah thazaang an chap tiah theih a si. KNU le PDF nih cun Kawkareik khuapi SAC ralkap hna umnak phungki sianginn le

a dang zung pakhat an khangh piak hna. Kahdohnak ah SAC ralkap thi le hliam an um, hriamnam zong tampi an lak piak hna tiah an langhter. Tuzing ah KNU le PDF nih kahdohnak an tuah mi hi Shan ram chaklei ah MNDAA le ahawle nih kahdohnak an tuah mi theihpi nak le lungtlinpinak langhternak ah kan tuah mi kahdohnak a si tiah KNU nih cun an langhter.