Roland Fambawl: LAI IDOL Biaceihtu (Judges) pawl nih remh an herh tiah ka ruah mi

LAI IDOL.  Biaceihtu nih remh a herh tiah ka ruahmi: An biahalmi: «There’s no such thing as a stupid question” ti a si nain a caan le thilsining he aa tlak lomi, aa pehtlai lomi le a herh lomi biahalnak cu a um bak. Hlasatu an tam i caan zong a tlawm caah «Kuak na zu maw?» «Khoika sang ah na tlun?» «A rami nan tam maw?» «Na ba maw?» tibantuk biahalnak nakin

a tang i ka hun langhtermi «constructive feedback» peknak ca tu ah khin caan tam deuh hmang hna sehlaw a ṭha.  Harsh criticsm: Hlasatu hna nih i remh an herhmi le an baunak zawn tete khi biaceihtu hna nih fak ngai in an nampiakmi hna a tam ngai in ka hmuh. Cun a caan cun pumpak namnak (personal attack) hna a um. Khikhi i remhnak nakin ningzahnak, thachiatnak le

ralchiatnak tibantuk tu a chuahter deuh kho. Destructive criticsm/feedback hi cu hrial ah a ṭha.  Constructive feedback: An performance, vocal technique, stage cung i an umning le an hla thimmi tibantuk ah mitvarnak le i remhnak a chuahtertu constructive feedback hi tam deuh pe kho hna sehlaw, cun vocal exercises, song selection, asilole stage performance tibantuk ah

tam deuh in ruahnak (tips) zong cheu kho deuh hna sehlaw a ṭha. Hihi an chim ngai ko nain thli lakah an bia an vaivuanhtermi a tam. Cun bia tanṭim ah ngol i peh ti lo asilole biafang hmanmi hrilhfiah thiam thai lo i «ka bia nih a tlinh lo» ti in ngol, asilole Mirang biafang a har ngaimi pakhat hman i hrilhfiah lo, tibantuk a um ṭheo. Feedback pekmi an fian lo cun pek lo he aa khat. Cucaah an fian bak a herh. Catialtu: Roland Fambawl

SAC LIB 32 In Ralkap Pakhat Hriam He kan pasaltha hna Sin Ah CDM A Tuah. 2023 September 8 — Kyainseikgyi khua hrambunh SAC LIB 32 in SAC ralkap pakhat cu hriam he KNU,KNLA B17, C02 sin ah CDM a tuah tiah thawng theih a si. SAC nih mipi a hrem mi hna le hramhram in a uknak hna kha a zoh khawh ti lo caah SAC ralkap kuttang in

a chuak i mipi he fonh in SAC ralkap doh ṭhan ding in KNU sin ah aa fonh hi a si. Cu kum 22 ralkap pa nih MA-1 zuun 1, kuanbawm 5, 5.56 kuan 75 le Equipment 1 aa rak chuahpi khawh caah sing 50 laksawng an pek tiah theih a si.

Kalaymyo Ah Ruahti A Tam Ruangah Ti A Lian!. 8 Sept 2023 Sagaing ramṭhen, Kalaymyo ah nizaan September 7, zaanlei in ruahpi cat loin a sur ruangah ti a lian i vawlei niamnak ah a ummi hna cu ti nih a liamhnawh hna caah a himnak hmun ah an i ṭhial, tiah theih a si. Kalaymyo, Upauk tiva cu a ṭhang i a liam pinah Kalaymyo sangchung innchung tiang ti nih a luhhnawh hna caah vawlei a san deuhnak hmun ah an i ṭhial hna, tiah tualchung mi pakhat nih a chim. Atu bantuk in tiva ti an lianh caah

Kalaymyo khuachung sianginn cheukhat cu an kharpiak hna. Taungzalatt sangchung Upauk tiva cu a ṭhan tuk caah hlei donhmi zong a kiak, tiah tualchung mi nih an chim. “Simyaung lam ni chuahlei um hleidonh a kiak i, hleidonh tamdeuh cu ti nih a phun hna, innzuat saṭil zeimawzat zong ti nih a phum hna” tiah Kalaymyo, Taungzalat sang um mi pakhat nih a chim.

Vok, Ar Le Sasen Sa A Zawmi Cu Zuar Lo Dingin Falam Christian Ministers Fellowship(FCMF) Nih Nawlnak An Tuah | 8 Sept 2023 A luancia August thla thawk in Kalaymyo le ramri ah vok zawtnak a karh i Falam khuapi zong ah zawtnak a ngeimi innzuat saṭil sa cu zuar lo dingin Falam Christian Ministers Fellowship(FCMF) nih nawlnak an tuah. Khuate lei ah

zawtnak pulrai nih a tlunhmi innzuat saṭil leng ah Caw, Naa le Sia hna cu a hlankan nili ninga ah zawtkham sii chunh in nan zuar lai lo, tiin FCMF nih nizan September 7 ah an thanh. “September thla chung ah Falam khuachung ah vok zawtnak ruangah vok cheukhat a thimi an um. Khuate lei in vok fa an rak zuarmi hna cu an zaw i fur caan a si ruangah

kik nih a tlaih ko hna tiin kan ruah. Zawtkham sii kan chunh hna i rawl a ei ṭhanmi cu an dam. Rawl a ei lomi cu nikhat nihnih ah an thi,” tiah Falam khua um vok zuatu pakhat nih Zalen ah a chim. Falam peng khuate in zawtnak a ngeimi vok le saṭil cu Falam khuachung ah rak zuar lo ding in an ti pinah Sipin sa zuarnak dawr ah zuar lo ding in le Falam khuachung ah chiat caan le ṭhat caan lawng ah zan ah lengchuah ding in FCMF nih cun theihternak an tuah.