Hakha khua ah mifir nih dawr an bauh!

Hakha khua ah mifir nih dawr an bauh

Chin ramkulh, Hakha khua, Leisen sang, MPT zung pawngah a ummi A Ngak dawr cu September 21 zinglei ah mifir nih an bauh tiah theih a si.

“An pa hi seh thilrii a remh pah mi a si i a remh cuahmah liomi phone le adang dang thilrii tampi an lak piak hna. A zapi te an lakmi hi sing 20 man cu a si lai” tiah a Leisen sangmi pakhat nih The Chinland Post ah a chim.

Chin ramkulh, Tedim khua zong ah thil fir le inn bauhnak hna a tam i September 20 zongah Tedim khua inn pakhat cu mifir nih an bauh i tangka 104,000ks an rak fir tiah theih a si.

September 18 zongah Tedim khua, Construction rianṭuantu pawl an umnak inn pakhat an bauh piak hna i tangka 150,000ks an fir lengah zarhpi ni pumh lioah cycle 2 an rak fir tiah theih a si.

Atulo kan ram a ṭha lomi dirhmun kha mifir le damiah nih caanṭha hmang in thilfir le thahnawnnak hna a karh khomi a si, atu nakin hmailei ah fir le ṭhat lonak a karh kho chin mi a si.

Atulio khuapi chung hna ahcun mifir le damiah pawl phuannak hmunhma a um lo caah mipi hna nih ralring tein le fimkhur tein kan um a herh tiah upa pakhat nih The Chinland Post ah a chim.

Relchap: Thantlang peng mipi palek phu cawnnak No. 3 tlamtling tein an dih

Chin ramkulh, Thantlang peng, mipi uknak phu hruainak in Thantlang peng mipi palek phu cawnnak No. 3 cu Thantlang peng hmunhma pakhat ah tlamtling tein an dih tiah theih a si.

Cu cawnnak ah minung 56 an kai kho i Karate, palek rianṭuannak a hrampi, phung le sual buarnak pawl zohfel daan hna an cawng i cawnnak a dih mi pawl kha certificate an pek hna tiah theih a si.

Cawnnak a dih cang mi hna nih Palek phu nih tinhmi a simi khua daihnak le zauk phung lennak, mipi caah rianṭuannak rian pawl kha CDF-Thantlang tlaihmi hmunhma pawl ah khuabawi pawl he fonh in phungning tein rian an ṭuan lai tiah Thantlang mipi uknak phu nih September 21 ah an thanh.Thechinlandpost