Chin News

A poi tuk ee: Kan Laitlang Paletwa lei ah SAC Ralhrang Miakpi bak in Bomb an thlak ee thi le hliam kong kan langhter

Paletwa Siizung Rianṭuantu Umnak Quater Chung Ah Hriamngan A Tla I Ngakchia Pakhat Hliam A Pu. 8 December 2023 Chin ramkulh, Paletwa khuapi, Myoma sang siizungpi rianṭuantu hna an umnak quater chung ah hriamngan a tla i ngakchia pakhat hliam a pu, tiah tualchung mi sin in theih a si. Nihin December 8, zinglei suimilam 10:00 hrawng ah Paletwa siizungpi chung rianṭuantu hna umnak inn ah hriamngan a tlak ruang ah

kum 10 tluk ngakchia pakhat hliam a pu, inn a rawkmi zong a um pah, tiah tualchung mi pakhat nih Zalen ah a chim. “Nihin zinglei suimilam 10:00 hrawng ah a puah a si. Khoika lei in dah an kah fian a si lo. Kum 10 tluk ngakchia pakhat aa hliam i inn cheukhat an rawk pah. Tualchung mi cu thinphang ngaiin an um,” tiah tualchung mi pakhat nih cun a chim. Cu hriamngan cu zeibantuk hriamtlai phu nih dah an kah fian a si lo i hriamngan a puahnak hmun cu Paletwa palik nih chekhlatnak an tuah, tiah an chim.

Tonzang Peng Ah Peng Council Thar An Dirh Khawh Cang. 8 November 2023. CDF Tonzang nih Tonzang peng chung ah Peng Council thar an dirhnak kong cu nizan December 7 ah thanhnak an tuah. December 7 ah Chinland Council tonpumhnak cu tlamtling tein kan lim i Chinland Council zong tlamtling tein kan ser khawh. Cu pin ah Chinland Council ṭuanvo ngeitu minung 23 zong kan thim khawh hna, tiah CDF Tonzang nih an langhter.  Chinland Council tonpumhnak ah

a kaimi Tonzang peng aiawhtu minung 10 nih a hlan i Tonzang peng mizapi ukhruainak phu min zong Tozang Peng Council tiin an thlen cang, tiah theih a si.  Hramhram in nawlngeihnak latu SAC ralkap doh lo in Tonzang peng mizapi ukhruainak phu a dirhtu phu nih Tonzang peng i a ummi mizapi dihlak sin ah theihternak an tuahmi vialte zumh lo ding le Tonzang Peng Council cu December 7 thawk in ser a si cangnak kong cu CDF Tonzang nih theihternak an tuah.

Kokang Hmunram Kahdohnak Ah MNDAA Kut In SAC Ralbawi Aung Zaw Lin A Thi. 8 December 2023 Shan ramkulh chaklei, Konekyan sakhan kahdohnak ah hriamnam chia duh lo in a zaammi SAC ralkap pawl cu MNDAA nih an dawi hna i an kah ṭhan hna hnu ah SAC ralbawi Aung Zaw Lin cu a thi, tiah MNDAA nih nizan December 7 ah an thanh. Shan ramkulh chaklei, Kokang hmunram chaklei Mawhtaih, Chonkan le Konekyan hmunram chung SAC ralkap sakhan laak lioah hriamnam chiah in aa apmi ralbawi an um nain a zaam ṭhanmi an um caah December 6 ah MNDAA nih

an dawi hna i an kah ṭhan hna. Cu kahdohnak i a thimi lak ah pakhat cu Sah-Kah-Khah 12 in ralbawi Aung Zaw Lin a si tiah fehternak he an thanh. Konekyan sakhan in a zaammi SAC ralkap pawl cu MNDAA nih an kah ṭhan hna i December 1 ni ah ralkap 100 tluk an thih pin ah December 4, zan suimilam 11:00 hrawng ah ralkap 7 an tlaih ṭhan hna, tiah theih a si. SAC ralkap Sah-Kah-Khah 16 tang Battalion 69 in ralbawi pakhat cu November 27 ni ah Shishan hmunram Shaukpaihaih hmun ah an rak tlaih. Hriamnam chiah in aa ap cangmi chung in a zaam ṭhanmi ralkap cheukhat an um caah

MNDAA nih an kawl hna i nifatin in ṭangṭi phu hna he hmunram thianhfelnak zong an tuah, tiah theih a si. SAC ralbawi thihnak kong he pehtlai in MNDAA chimphuannak nawlngeitu nih cun SAC ralbawi Brigadier General Aung Zaw Lin ruak cu ralkap sinah kuat an duhnak kong le SAC nawlngeitu sinah pehtlaihnak an tuah ko nain zeihmanh lehnak a tuah rih lonak kong a chim. SAC chimphuannak nawlngeitu Zaw Min Htun nih cun Shan ramkulh chaklei ah ralkap hruaitu pakhat a thihnak kong a chim nain SAC ralbawi Aung Zaw Lin a thihnak kong tu cu a chim lo.