Chin News

Thluak an hman cang: SAC Ralhrang Zaw Min Htun nih Kahdohnak Daihter Ding Ah Rammi Dihlak Ṭangṭi Ding In sawmnak a tuah cang

Kahdohnak Daihter Ding Ah Rammi Dihlak Ṭangṭi Ding In Zaw Min Htun Nih Chim. 8 December 2023 Hriamtlai phu le SAC ralkap kar kahdohnak a daih khawh nakding ah mizapi lungrual tein ṭangṭi ding in SAC chimnak nawlngeitu Zaw Min Htun nih nizan December 7 ah a chim.  Zaw Min Htun nih cun Myanmar ram zalennak kan hmuh hnu in hriamtlai phu tete an karh i buaibainak a rak chuak. Cu vialte a daih khawh nakding ah cun SAC ralkap le humhimnak latu palik lawng si lo in

mizapi lungrual tein kan um i kan ṭanṭi a hau, tiah a chim. Dohthlennak a tuahmi hriamtlai phu le SAC ralkap kar ah fak piin kahdohnak a zual lio le khuapi cheukhat zong hriamtlai phu nih an laak lio theng ah atu bantukin Zaw Min Htun nih a chim hi a si. Myanmar rampi a daihnak le upadi ning in rian ṭuan khawhnak ca ah mizapi le tlangcung hriamtlai phu hna cu rianṭuanṭi ding ah SAC chimnak nawlngeitu nih nawlnak a tuah.

Chinland Council Le Phunghram. A voikhatnak Chinland Council tonpumhnak ah December 4-7, 2023 tiang Victoria Base, Chinland ah tlamtling tein an tuah i CNF/A, Chin hlutdaw palai hna, peng le tlang aiawhtu hna le ramchung ramleng in sawm mi palai hna, an dihlak minung 235 an i tel kho.  December 6, 2023, zinglei 11:33am ah Chinland Constitution an fehter i cu ni ṭhiamṭhiam zanlei 1:27pm ah Chinland Council zong an ser, an fehter khawh. CC an ferhter ni thawk in ni 60 chung ah Chinland Hlutdaw, Chinland Cozah le Chinland Biaceihnak (supreme court) hna cu an ser lai. CC hruaitu hna cu,

Pu Zing Cung (Chairman), CNF/A, Pu Min Nyo (Vice Chairman-1), Kanpetlet MP, Pu Bawi Kung (VC-2), CDF-Mara, Salai Paul (General Secretary), CDF-Paletwa, Pu Htet Ni (Joint GS-1), CNF/A, Pu Ṭial Ling (Joint GS-2), Hakha MP, Hi hna hi CC lutlai cu an si i CC chungtel dihlak 112 an si. CNF/A in 27, SAC a doh mi Chin MP in 17, CDF le pengtlang palai 68 hna an si. Chinland Phunghram Dal 3nak, caang 26 nak ning ah cun MP 27, CNF in 27, peng le tlangthluan palai 86, an dihlak chungtel 140 in Chinland Council hi ser ding a si. Asinain a cunglei bantuk khin an ser phot rih i a herhning in

an kauh te lai. Chinland Phunghram cu dal 10 a si i caang 106 a um. Dal 1nak ah phunghram hna, dal 2nak ah Chinland serning tungtlang, dal 3nak ah Chinland Council, dal 4nak ah phunghram sernak, dal 5nak ah ukhruainak, dal 6nak ah biaceihnak, dal 7nak ah runvennak le humhimnak, dal 8nak ah pengtlang ukhruainak, dal 9nak ah thimnak le dal 10nak ah phunghram dangdang hna an si. Chinland Council siseh, Chinland Phunghram siseh, ni 60 chung i an ser ding mi Chinland Cozah siseh dohthlennak caan chung ca lawng an si. Chinland Phunghram Kherhhlainak kan peh ṭhan te lai.

Kokang Hmunram Kahdohnak Ah MNDAA Kut In SAC Ralbawi Aung Zaw Lin A Thi. 8 December 2023 Shan ramkulh chaklei, Konekyan sakhan kahdohnak ah hriamnam chia duh lo in a zaammi SAC ralkap pawl cu MNDAA nih an dawi hna i an kah ṭhan hna hnu ah SAC ralbawi Aung Zaw Lin cu a thi, tiah MNDAA nih nizan December 7 ah an thanh. Shan ramkulh chaklei, Kokang hmunram chaklei Mawhtaih, Chonkan le Konekyan hmunram chung SAC ralkap sakhan laak lioah hriamnam chiah in aa apmi ralbawi an um nain a zaam ṭhanmi an um caah December 6 ah MNDAA nih

an dawi hna i an kah ṭhan hna. Cu kahdohnak i a thimi lak ah pakhat cu Sah-Kah-Khah 12 in ralbawi Aung Zaw Lin a si tiah fehternak he an thanh. Konekyan sakhan in a zaammi SAC ralkap pawl cu MNDAA nih an kah ṭhan hna i December 1 ni ah ralkap 100 tluk an thih pin ah December 4, zan suimilam 11:00 hrawng ah ralkap 7 an tlaih ṭhan hna, tiah theih a si. SAC ralkap Sah-Kah-Khah 16 tang Battalion 69 in ralbawi pakhat cu November 27 ni ah Shishan hmunram Shaukpaihaih hmun ah an rak tlaih. Hriamnam chiah in aa ap cangmi chung in a zaam ṭhanmi ralkap cheukhat an um caah MNDAA nih

an kawl hna i nifatin in ṭangṭi phu hna he hmunram thianhfelnak zong an tuah, tiah theih a si. SAC ralbawi thihnak kong he pehtlai in MNDAA chimphuannak nawlngeitu nih cun SAC ralbawi Brigadier General Aung Zaw Lin ruak cu ralkap sinah kuat an duhnak kong le SAC nawlngeitu sinah pehtlaihnak an tuah ko nain zeihmanh lehnak a tuah rih lonak kong a chim.  SAC chimphuannak nawlngeitu Zaw Min Htun nih cun Shan ramkulh chaklei ah ralkap hruaitu pakhat a thihnak kong a chim nain SAC ralbawi Aung Zaw Lin a thihnak kong tu cu a chim lo.