Chin News

A poi ko: AA Rakhine sal taang ding ah CDF-Mindat Le MTC/MDF Mara Cu Ṭangṭi In Ral Kan Dohṭi Lai Tiah Hmunkhat Ah Cathanh An Chuah

CDF-Mindat Le MTC/MDF Cu Ṭangṭi In Ral Kan Dohṭi Lai Tiah Hmunkhat Ah Cathanh An Chuah. 7 December 2023 Chin hriamtlai phu CDF-Mindat le Maraland Territorial Council cu nuhrin covo laak ṭhan ding in le a dikmi ramkhel a chuah ṭhan nakding ca ah ṭangṭi in hmunkhat ah ral kan dohṭi lai, tiah nihin December 7 ah thanhnak an tuah. Hramhram in nawlngeihnak a latu SAC uknak ṭha lo a hram bongh ding ah

CDF Mindat le MTC/MCF cu a luancia November 30 ni thawk in kaphnih ṭuanṭi ding kong biachahnak an ngei. Cu pin ah hramhram in nawlngeihnak latu SAC uknak ṭha lo telh in zeibantuk uknak paohpaoh a si ah mahte khuakhan lairelnak he tlukruannak kalpi in biaknak le miphun he aa pehtlaimi vialte cu a hmasa ah chia lem lo in nuhrin covo laak ṭhan ding kha a biapi ah

chia in a dikmi ramkhel a chuah khawh ṭhan nakhnga ca tu ah ṭangṭi in hmunkhat ah ral kan dohṭi lai, tiah an cathanh ah cun an langhter. A luancia zarh chung ah Chinland Council Conference tonpumhnak zong ah CNC-Mindat/CDF Mindat cu kan i tel lai lo, tiah Chin hriamtlai dang phu 2 hna he cathanh an rak chuah.

Kokang Hmunhma Kahdohnak Chung Ah Ralkap MOC No. 12 Brigadier General A Thi. 2023 December 7 — Shan ram chaklei, Kokang hmunhma kahdohnak chung ah ralkap MOC No. 12 bawicem Brigadier General Aung Zaw Lin a kah i a thi tiah MNDAA nih an thanh. MNDAA nih Kokang hmunhma chung ah aa thup mi ralkap bawi ngan le ralkap pawl an fim lengmang hna i ralkap MOC No. 12 bawicem Brigadier General Aung Zaw Lin zong

an fim khawh tiah theih a si. Kokang hmunhma ah a tang mi ralkap pawl cu MNDAA nih December 6 ah an fim thluahmah hna i a thi mi ralkap ruak pakhat an hmuh, cu ruak cung ah Brigadier General rank hmahthahnak an hmuh caah a thi mi hi MOC No. 12 bawicem Brigadier General Aung Zaw Lin a si tiah an fehter i amah hi ralkap University Batch 41 ah a dih mi a si tiah Khit Thit nih a langhter

 

Phungbuar Ruang Ah Thong Rak Thlakmi Ralkap Hlun Vialte Cu Chuahter In Ralkap Ah An Luhter Ṭhan Hna. 7 November 2023 Hramhram in nawlngeihnak a latu SAC uknak tang rianṭuantu lakah phung buar ruang ah thong thlak a tong mi ralkap hlun vialte cu nihin December 7 ah an luatter dih hna i cu luattermi thongtla pawl cu an rank kaiter in ralkap ah an luhter ṭhan hna, tiah Khit Thit Media nih a ṭial. Nihin December 7 ah Min Aung Hlaing nih

phungbuar ruang ah thong a rak thlakmi cu a luatter ṭhan hna i, a zaammi hna le zulhphung a zul duh lomi hna pinah rianṭuan chung ah ralkap phung he aa kalh in khuasak a hmangmi vialte cu a chuahter dih hna. Thonginn in chuahmi ralkap hlun pawl cu luatnak an hmuh ni thawk in ralkap ah luh colh an si. Ralkap ah lut duh lomi cu a taang rihmi an sualnak he fonh in dantat an si lai, tiah an langhter. Luatnak pekmi thongtla pawl cu tualchung mi bantukin aa umtermi ralkap pawl nih anmah le an umnak zung cio ah an kalpi hna i rank kaiter in hriamnam an tlaihter colh hna. Cu thongtla chuak pawl cu

hriamnam he mipi lak ah umter an timh hna, tiah Khit Thit Media nih cun a langhter. Thong chuakmi ralkap pawl cu zeibantuk phung hmanh nih a hren ti hna lo pin ah zalennak an pek cangmi an si bantukin sualnak a phunphun an tuah ding a fian ruang ah tualchung mi zong umkal ṭhutdir i ralring cio ding in thanhnak an tuah. Min Aung Hlaing nih luatnak a pekmi ralkap hlun pawl cu 1,000 leng an si lai, tiah ralkap chung thawngpetu nih an chim.

MNDAA Nih Tayintaung Sakhan An Laak Hnu Ah Laukkai Pawngkam Ah SAC Ralkap Sakhan 4 Lawng A Taang. 7 December 2023 Shan ramkulh, Laukkai khuapi he meng 2 tluk aa hlatmi Tonechain sang thlanglei kam Tayintaung no.4 sakhan cu Kokang ralkap MNDAA nih nizan December 6, zinglei suimilam 9:00 hrawng ah an laak khawh i SAC ralkap ca ah a biapi ngaimi High Point tlangbo zong a ningpi in an laak khawh, tiah theih a si. Kokang hmunram chung um Laymyiathna pura sakhan tiah auhmi Tayintaung cu SAC ralkap ca ah a biapi ngaimi High Point pakhat a si i, cu tlangbo ah cun ralkap sakhan 4 a um. A luancia December 3 ni ah MNDAA nih an rak kah i ni hnih chung an kah hnu, December 5, zanlei suimilam 3:28 ah

Tayintaung ah a ummi ralkap sakhan 3 cu an laak khawh. Cu pin ah, nizan December 6, zinglei suimilam 9:00 hrawng ah a taangmi sakhan pakhat zong an laak khawh ṭhan i ralkap nih caan saupi chung umhmun an khuar cangnak Tayintaung cu a ningpi in MNDAA nih an laak khawhnak kong an thanh. Cu sakhan kahdohnak ah cun SAC ralkap 11 an tlaih hna i an tlaihmi hna chung in kum upa ngai cangmi tar zong an i tel. MNDAA nih Tayintaung sakhan an laak hnu in

Laukkai pawngkam chung ah ralkap sakhan ṭha High Point pawl a um ti lo i sakhan fa deuhmi 4 lawng an taang cang, tiah MNDAA nih an thanh. 1027 Operation a kalpi cuahmahtu MNDAA, TNLA le AA ralkap hna nih nizan December 6, ni khat chung ah SAC ralkap ca ah a biapi ngaimi sakhan 4 an laak khawh i Howitzer hriamngan telh in hriamnam tam ngai an laak khawh pin ah ralkap zeimawzat zong an tlaih hna, tiah theih a si.