Myanmar News

Ttihnung ko cang: Min Aung Hliang nih Thongtla cia Kawl ralkap pawl cu a chuah hna i, Ral ram ah a kalter colh hna

Phungbuar Ruang Ah Thong Rak Thlakmi Ralkap Hlun Vialte Cu Chuahter In Ralkap Ah An Luhter Ṭhan Hna. 7 November 2023 Hramhram in nawlngeihnak a latu SAC uknak tang rianṭuantu lakah phung buar ruang ah thong thlak a tong mi ralkap hlun vialte cu nihin December 7 ah an luatter dih hna i cu luattermi thongtla pawl cu an rank kaiter in ralkap ah an luhter ṭhan hna, tiah Khit Thit Media nih a ṭial. Nihin December 7 ah Min Aung Hlaing nih phungbuar ruang ah

thong a rak thlakmi cu a luatter ṭhan hna i, a zaammi hna le zulhphung a zul duh lomi hna pinah rianṭuan chung ah ralkap phung he aa kalh in khuasak a hmangmi vialte cu a chuahter dih hna. Thonginn in chuahmi ralkap hlun pawl cu luatnak an hmuh ni thawk in ralkap ah luh colh an si. Ralkap ah lut duh lomi cu a taang rihmi an sualnak he fonh in dantat an si lai, tiah an langhter. Luatnak pekmi thongtla pawl cu tualchung mi bantukin aa umtermi ralkap pawl nih

anmah le an umnak zung cio ah an kalpi hna i rank kaiter in hriamnam an tlaihter colh hna. Cu thongtla chuak pawl cu hriamnam he mipi lak ah umter an timh hna, tiah Khit Thit Media nih cun a langhter. Thong chuakmi ralkap pawl cu zeibantuk phung hmanh nih a hren ti hna lo pin ah zalennak an pek cangmi an si bantukin sualnak a phunphun an tuah ding a fian ruang ah tualchung mi zong umkal ṭhutdir i ralring cio ding in thanhnak an tuah. Min Aung Hlaing nih luatnak a pekmi ralkap hlun pawl cu 1,000 leng an si lai, tiah ralkap chung thawngpetu nih an chim.

MNDAA Nih Tayintaung Sakhan An Laak Hnu Ah Laukkai Pawngkam Ah SAC Ralkap Sakhan 4 Lawng A Taang. 7 December 2023 Shan ramkulh, Laukkai khuapi he meng 2 tluk aa hlatmi Tonechain sang thlanglei kam Tayintaung no.4 sakhan cu Kokang ralkap MNDAA nih nizan December 6, zinglei suimilam 9:00 hrawng ah an laak khawh i SAC ralkap ca ah a biapi ngaimi High Point tlangbo zong a ningpi in an laak khawh, tiah theih a si. Kokang hmunram chung um Laymyiathna pura sakhan tiah auhmi Tayintaung cu SAC ralkap ca ah a biapi ngaimi High Point pakhat a si i, cu tlangbo ah cun

ralkap sakhan 4 a um. A luancia December 3 ni ah MNDAA nih an rak kah i ni hnih chung an kah hnu, December 5, zanlei suimilam 3:28 ah Tayintaung ah a ummi ralkap sakhan 3 cu an laak khawh. Cu pin ah, nizan December 6, zinglei suimilam 9:00 hrawng ah a taangmi sakhan pakhat zong an laak khawh ṭhan i ralkap nih caan saupi chung umhmun an khuar cangnak Tayintaung cu a ningpi in MNDAA nih an laak khawhnak kong an thanh. Cu sakhan kahdohnak ah cun SAC ralkap 11 an tlaih hna i an tlaihmi hna chung in kum upa ngai cangmi tar zong an i tel. MNDAA nih

Tayintaung sakhan an laak hnu in Laukkai pawngkam chung ah ralkap sakhan ṭha High Point pawl a um ti lo i sakhan fa deuhmi 4 lawng an taang cang, tiah MNDAA nih an thanh. 1027 Operation a kalpi cuahmahtu MNDAA, TNLA le AA ralkap hna nih nizan December 6, ni khat chung ah SAC ralkap ca ah a biapi ngaimi sakhan 4 an laak khawh i Howitzer hriamngan telh in hriamnam tam ngai an laak khawh pin ah ralkap zeimawzat zong an tlaih hna, tiah theih a si.

Taingen Ah SAC Ralkap Le CDF CDM Siyin Kahdohnak A Chuak 7 December 2023. Chin ramkulh Tedim peng Taingen khua ah nihin December 7 zinglei ah SAC ralkap le CDF CDM Siyin karah kahdohnak a chuak i Kalaymyo um SAC ralkap nih hriamngan in kah an bawmh hna, tiah tualchung mi hna sinin theih a si.  Nihin December 7 zinglei suimilam 5:00 tluk ah kahdohnak a chuak i meithal puah thawng zong a than kong le ruah a sur caah minmei a tam i vanlawng a rat khawh lai lonak kong

tualchung mi pakhat nih a chim.  Taingen khua cu Kalay-Falam-Hakha-Kalay-Tedim lam cung ah a ummi a si i SAC ralkap nih umhmun an khuarnak hmun a si. Tuzing kahdohnak ah ah Kalay Sianghleirun Sianginn chung in SAC ralkap nih hriamngan kah an bawmh hna, tiah an chim.  Kalay-Taingen-Tedim motor lampi cu Chin ramkulh chaklei he pehtlaihnak lam a si i November 27 ah CDF CDM Siyin nih lam an rak kham.

Rezua Sakhan In Hriamnam Chiah Aa Timmi Captain Pa Kong Cunglei Ralbawi Sin Ah A Phuangtu Ralkap Pa Cu Rank An Kaiter Nain Sakhan Ah A Thi Colh. 6 December 2023. Chin ramkulh, Rezua khuapi SAC ralkap sakhan kahdohnak ah Captain Min Kaung Htet cu November 28 ah hriamnam chiah ding in aa timhnak kong cu Sergeant Ye Myint Zaw nih cunglei ralbawi sin ah a phuan i amah cu Second Lieutenant rank tiang an pek nain kahdohnak ah Chin hriamtlai phu kut in a thi colh, tiah Khit Thit Media nih a langhter.  Kahdohnak lioah phone chung ah Lieutenant Colonel rank an pekmi ralkap Ye Myint Zaw nih No. 1 Special Operation uktu General Ko Ko Oo sin ah vanlawng in kahdoh bawmh ding in bawmhhalnak a tuah lioah

Chin hriamtlai phu nih an kah i a thi, tiah theih a si.  Khit Thit Media nih Ralbawi General Ko Ko Oo le Lieutenant Colonel Ye Myint Zaw phone in an i chawnhnak audio an langhter mi ah Chin hriamtlai phu cu sakhan chung tiang an lut cang i vanlawng in bomb thlakpiak ding ah Lieutenant Colonel Ye Myint Zaw nih nawlnak a tuahmi cu General Ko Ko Oo nih a rauh hlan ah vanlawng a rak phan lai tiin a hnemh ko nain ralkap Ye Myint Zaw a thih tiang ah vanlawng a phan lo. Sakhan an sungh lai ah vanlawng in an bawmh khawh hna lo ruang ah rank an kaiter mi a sinak kong zong

Chin ralkap pakhat nih Khit Thit Media ah a chim.  General Ko Ko Oo le Lieutenant Colonel Ye Myint Zaw phone an i chawnhnak audio ah Lieutenant Colonel Ye Myint Zaw nih Chin hriamtlai phu nih drone in bomb an thlak tuk hna ruang ah a lenglei thil sining zoh a ngamh lonak a chimmi zong theih khawh a si.  Chin hriamtlai phu sin ah hriamnam a chiami Captain Min Kaung Htet le ralkap pakhat cu Chin hriamtlai phu nih ṭha tein an zohkhenh hna, tiah theih a si. Photo Crd.