Myanmar News

Thawngpangthar; Kan pasaltha hna tuchun SAC ralhrang camp an laak colh, ralhrang hi zat an thi colh

Kyaukme Le Namkham Peng SAC Ralkap Sakhan 2 Cu TNLA Nih An Laak . 6 December 2023. Shan ramkulh chaklei, Kyaukme le Namkham peng chung SAC ralkap sakhan 2 cu TNLA nih an laak i hriamngan le hriamnam dang 23 zong an laak khawh. Nizan December 5, zan suimilam 8:00 hrawng ah Kyaukme peng Mailone ralkap sakhan cu Ta’ang ralkap PSLF/TNLA nih an laak. Cu sakhan kahdohnak ah cun TNLA nih 80/60mm hriamngan le hriamnam dang 13 le  ralkap hmanmi thilri zong an laak khawh, tiah theih a si. December 5 zan ṭhiamṭhiam ah Namkham peng Maiwe ralkap sakhan cu

PSLF/TLNA ralkap nih an kah i an laak khawh ṭhan. Maiwe sakhan cu Ta’ang ralkap PSLF/TNLA nih 1027 Operation in December 2 ah an rak kah i ni 4 a rauh hnu ni 5nak ah an laak khawh. Cu sakhan kahdohnak ah cun 60mm hriamngan telh in hriamnam 10 zong an laak khawh.Nizan December 5, sakhan an laakmi pahnih telh in 1027 Operation thawk in October 27-December 5 tiang ah TNLA nih SAC ralkap sakhan 53 an laak khawh cang, tiah theih a si.

Paletwa Peng Tharonai Byuha Sakhan Cu Rakhine Ralkap AA Nih An Laak 5 December 2023 Chin ramkulh, Paletwa peng vanlawng bual pahnih a umnak SAC ralkap Tharonai Byuha sakhan cu Rakhine ralkap AA nih kan laak cang, tiah an thanh. Nizan December 4, zanlei suimilam 1:00 hrawng ah Paletwa peng chung vanlawng bual 2 a umnak SAC ralkap Tharonai Byuha sakhan cu Rakhine ralkap AA nih an laak khawh. Cu sakhan kahdohnak ah cun ralkap a thimi an tam i hriamnam zeimawzat zong an laak khawh, AA ralkap lei in thi le hliam an um ve, tiah theih a si. A luancia November 14, zinglei 6:00 thawk in

Paletwa peng chung SAC ralkap Tharonai Byuha sakhan le Hnonebu Byuha sakhan cu Rakhine ralkap AA nih an rak kah i ni 21 a rauh hnu ah Tharonai Byuha sakhan cu an laak khawh. A taang rihmi Hnonebu Byuha sakhan zong pehzulh in an kah, tiah theih a si. Cu sakhan pahnih an sungh lo nakhnga SAC ralkap nih hriamngan le vanlawng in kahdohnak an tuah pin ah siivai ngeimi bomb khu Chemical Warfare Agents zong an hman nain Rakhine ralkap AA nih Tharonai Byuha sakhan cu an laak khawh ṭhiam, tiah theih a si.

SAC Ralkap Nih Khampat Khua An Luhhnawh Ṭhan Lai Ti Thawng A Than Caah Khuami Thinphang In An Um. 5 December 2023 Mizapi ralkap nih an laak cangmi Khampat khua cu SAC ralkap nih luhhnawh in laak ṭhan an i tim, ti thawngpang a than caah khuami hna cu thinphang ngai in an um kong Khampat khuami nih The Chin Post ah an chim. Kan hnuzarh cawnnirukni, December 2 khan SAC ralkap 80 tluk hrawng cu nichuahlei Letsekhan phak hlan Hmuntha khua in

meng li hrawng aa hlatnak hmun an rak phan. Hmuntha khuami hna cu an himnak ding ah KIA le PDF nih nunau le ngakchia hna cu Khampat khua lei an i ṭhial ah a ṭha lai an ti hna i, cu zan ah cun Khampat no. 2 lei ah an i dor hna. No. 4 lei chungkhat sin zong ah aa dor mi an um, tiah khampat khua pakhat nih The Chin Post ah a chim. SAC ralkap pawl hi Khampat nichuahlei ah an lut i lo a riak mi zong SAC ralkap nih an tlunter dih hna. Atu i a rak ra mi SAC ralkap hna hi

Kalay lei um SAC ralkap an si lai, tiah zumh a si. Tamu lei zong in atu hi SAC ralkap nih an vun nor hna i Thantapin khua an phan cang, inn zong an khangh len, tiah Khampat khuami pakhat nih The Chin Post ah a chim.  Hi bantuk in SAC ralkap nih Khampat khua luhhnawh an timh thawng a thang nain khua chuaktak in a zaam mi a um thawng theih a si lo.

Vakok-CNDF Cu CNO/CNDF In An Chuak. Dipa 6, 2023 (Nithumni) Kum 2 chung CNO/CNDF ah um in dohthlennak a tuah mi Vakok-CNDF cu CNO/CNDF in kan chuak cang tiah December 6, 2023 ah Vakok CNDF nih cathanh an chuah. Hi kong he pehtlai in Vakok CNDF hruaitu pakhat nih cun “Anmah sin ah um dingin bia kan rak i ruah lio ah a herh ahcun chuah than i hawikom sinak in um ding ah kan rak ti mi a si ko. Tutan kan chuah hi zeidang ruang ah a si lo. Kan policy ah kan i khah lonak a um. Cu pin ah kannih cu Lairawn deuh ah a cawlcang mi kan si caah

pehtlaihnak tuah zong a har, cucaah kan chuahnak a si” tiah The Chin Post ah a chim. Vakok battalion hi September 9, 2021 ah rak dirh mi a si i CNO/CNDF hruaitu hna he an i ceih hnu ah October 17, 2021 ah CNO/CNDF ah an i fonh i CNDF Brigade 1, battalion 2 in an um. Cu hnu cun Vakok CNDF tiah theih an si. Chinland Council dirhnak kong he pehtlai in Vakok Battalion hruaitu pakhat nih “Atu lawng cu CNO/CNDF in kan chuah a si i Chinland Council dirhnak kong ah zeihmanh chim khawh mi ka ngei rih lo, asinain tuanvo ngeitu hna nih an kan sawm a si ahcun kan i ceih lai i a tam deuh duhnak in biakhiahnak kan tuah ko lai” tiah The Chin Post ah a chim.