Chin News

Thawngpangthar: Kan Laitlang Paletwa SAC Ralhrang Camp nganbik mi cu AA ralkap nih an laak khawh kong an thanh

Paletwa Peng Tharonai Byuha Sakhan Cu Rakhine Ralkap AA Nih An Laak 5 December 2023 Chin ramkulh, Paletwa peng vanlawng bual pahnih a umnak SAC ralkap Tharonai Byuha sakhan cu Rakhine ralkap AA nih kan laak cang, tiah an thanh. Nizan December 4, zanlei suimilam 1:00 hrawng ah Paletwa peng chung vanlawng bual 2 a umnak SAC ralkap Tharonai Byuha sakhan cu Rakhine ralkap AA nih an laak khawh. Cu sakhan kahdohnak ah cun ralkap a thimi an tam i hriamnam zeimawzat zong an laak khawh, AA ralkap lei in thi le hliam an um ve, tiah theih a si. A luancia November 14, zinglei 6:00 thawk in

Paletwa peng chung SAC ralkap Tharonai Byuha sakhan le Hnonebu Byuha sakhan cu Rakhine ralkap AA nih an rak kah i ni 21 a rauh hnu ah Tharonai Byuha sakhan cu an laak khawh. A taang rihmi Hnonebu Byuha sakhan zong pehzulh in an kah, tiah theih a si. Cu sakhan pahnih an sungh lo nakhnga SAC ralkap nih hriamngan le vanlawng in kahdohnak an tuah pin ah siivai ngeimi bomb khu Chemical Warfare Agents zong an hman nain Rakhine ralkap AA nih Tharonai Byuha sakhan cu an laak khawh ṭhiam, tiah theih a si.

SAC Ralkap Nih Khampat Khua An Luhhnawh Ṭhan Lai Ti Thawng A Than Caah Khuami Thinphang In An Um. 5 December 2023 Mizapi ralkap nih an laak cangmi Khampat khua cu SAC ralkap nih luhhnawh in laak ṭhan an i tim, ti thawngpang a than caah khuami hna cu thinphang ngai in an um kong Khampat khuami nih The Chin Post ah an chim. Kan hnuzarh cawnnirukni, December 2 khan SAC ralkap 80 tluk hrawng cu nichuahlei Letsekhan phak hlan Hmuntha khua in

meng li hrawng aa hlatnak hmun an rak phan. Hmuntha khuami hna cu an himnak ding ah KIA le PDF nih nunau le ngakchia hna cu Khampat khua lei an i ṭhial ah a ṭha lai an ti hna i, cu zan ah cun Khampat no. 2 lei ah an i dor hna. No. 4 lei chungkhat sin zong ah aa dor mi an um, tiah khampat khua pakhat nih The Chin Post ah a chim. SAC ralkap pawl hi Khampat nichuahlei ah an lut i lo a riak mi zong SAC ralkap nih an tlunter dih hna. Atu i a rak ra mi

SAC ralkap hna hi Kalay lei um SAC ralkap an si lai, tiah zumh a si. Tamu lei zong in atu hi SAC ralkap nih an vun nor hna i Thantapin khua an phan cang, inn zong an khangh len, tiah Khampat khuami pakhat nih The Chin Post ah a chim.  Hi bantuk in SAC ralkap nih Khampat khua luhhnawh an timh thawng a thang nain khua chuaktak in a zaam mi a um thawng theih a si lo.

Vakok-CNDF Cu CNO/CNDF In An Chuak. Dipa 6, 2023 (Nithumni) Kum 2 chung CNO/CNDF ah um in dohthlennak a tuah mi Vakok-CNDF cu CNO/CNDF in kan chuak cang tiah December 6, 2023 ah Vakok CNDF nih cathanh an chuah. Hi kong he pehtlai in Vakok CNDF hruaitu pakhat nih cun “Anmah sin ah um dingin bia kan rak i ruah lio ah a herh ahcun chuah than i hawikom sinak in um ding ah kan rak ti mi a si ko. Tutan kan chuah hi zeidang ruang ah a si lo. Kan policy ah kan i khah lonak a um. Cu pin ah kannih cu Lairawn deuh ah a cawlcang mi kan si caah pehtlaihnak tuah zong a har, cucaah

kan chuahnak a si” tiah The Chin Post ah a chim. Vakok battalion hi September 9, 2021 ah rak dirh mi a si i CNO/CNDF hruaitu hna he an i ceih hnu ah October 17, 2021 ah CNO/CNDF ah an i fonh i CNDF Brigade 1, battalion 2 in an um. Cu hnu cun Vakok CNDF tiah theih an si. Chinland Council dirhnak kong he pehtlai in Vakok Battalion hruaitu pakhat nih “Atu lawng cu CNO/CNDF in kan chuah a si i Chinland Council dirhnak kong ah zeihmanh chim khawh mi ka ngei rih lo, asinain tuanvo ngeitu hna nih an kan sawm a si ahcun kan i ceih lai i a tam deuh duhnak in biakhiahnak kan tuah ko lai” tiah The Chin Post ah a chim.

CDF Mindat, ZFU Le CNO Nih Chinland Council Sernak Tonpumhnak I Tel Lo Ding In Cathanh An Chuahmi Kong Ah CDF-Tonzang Nih Lakhruak In Thanhnak An Tuah. 6 December 2023 Chinland Council dirhnak kong biaceih khuakhan tonpumhnak cu a ralaimi December 7-9 tiang tuah ding in timhtuah a si i tutan tonpumnak ah Mindat peng, Falam peng, Tedim peng le Tonzang peng a huaptu CNC-Mindat/CDF Mindat, CNO le PDF Zoland nih

Chinland Council dirhnak kong ceihkhannak meeting kan kai lai lo, tiah cathanh an chuahmi kong Cu cathanh an chuahmi kong he pehtlai in CDF Tonzang hruaitu theihternak le nawl i tel lo in tonpumhnak ah Tonzang peng ai-awh palai pawl i tel lonak ding kong cathanh an chuahmi cu a dik lomi cathanh a si. Kannih CDF Tonzang cu Chinland Council dirhnak kong ceihkhan tonpumhnak ah kan i tel ko lai, tiah nizan December 5 zanṭim ah lakhruak in cathanh an chuah. Chin miphun lungrualnak ca le hramhram uknak a hram in bongh khawh nakding ca ah tuah dingmi Chinland Council tonpumhnak ah

Tonzang mizapi ukhruainak phu le CDF Tonzang cu kan kai ko lai, tiah an thanh.  Cu bantuk ṭhiamṭhiam in ZPO/ZLC/CDF-Zanniatram nih Chinland Council sernak ding tonpumhnak le ceihkhannak ah kan i tel ve lai i mizapi humhimnak, runvennak le hramhram uknak a hram in bongh ding in rian a ṭuanmi le kan ṭangṭi hawi a simi, CNF/A, HPO, CDG Hualngoram, PDA Tedim le CDF hna he kan i fonh lai, tiah cathanh an chuah ve.