Chin News

A mak taktak; CNA/CDFs ttih tuk ah Rezua Sakhan In Hriamnam Chiah Aa Timmi Ralhrang Captain Pa Kong Cunglei Ralbawi Sin Ah A Phuangtu Ralkap Pa Cu Rank An Kaiter Nain Sakhan Ah A Thi Colh

Laitlang Rezua Sakhan In Hriamnam Chiah Aa Timmi Ralhrang Captain Pa Kong Cunglei Ralbawi Sin Ah A Phuangtu Ralkap Pa Cu Rank An Kaiter Nain Sakhan Ah A Thi Colh. 6 December 2023 Chin ramkulh, Rezua khuapi SAC ralkap sakhan kahdohnak ah Captain Min Kaung Htet cu November 28 ah hriamnam chiah ding in aa timhnak kong cu Sergeant Ye Myint Zaw nih cunglei ralbawi sin ah a phuan i amah cu Second Lieutenant rank tiang an pek nain kahdohnak ah Chin hriamtlai phu CNA /CDFs kut in a thi colh, tiah Khit Thit Media nih a langhter.  Kahdohnak lioah phone chung ah

Lieutenant Colonel rank an pekmi ralkap Ye Myint Zaw nih No. 1 Special Operation uktu General Ko Ko Oo sin ah vanlawng in kahdoh bawmh ding in bawmhhalnak a tuah lioah Chin hriamtlai phu nih an kah i a thi, tiah theih a si.  Khit Thit Media nih Ralbawi General Ko Ko Oo le Lieutenant Colonel Ye Myint Zaw phone in an i chawnhnak audio an langhter mi ah Chin hriamtlai phu cu sakhan chung tiang an lut cang i vanlawng in bomb thlakpiak ding ah Lieutenant Colonel Ye Myint Zaw nih nawlnak a tuahmi cu General Ko Ko Oo nih a rauh hlan ah vanlawng a rak phan lai tiin a hnemh ko nain ralkap Ye Myint Zaw a thih tiang ah

vanlawng a phan lo. Sakhan an sungh lai ah vanlawng in an bawmh khawh hna lo ruang ah rank an kaiter mi a sinak kong zong Chin ralkap pakhat nih Khit Thit Media ah a chim. General Ko Ko Oo le Lieutenant Colonel Ye Myint Zaw phone an i chawnhnak audio ah Lieutenant Colonel Ye Myint Zaw nih Chin hriamtlai phu nih drone in bomb an thlak tuk hna ruang ah a lenglei thil sining zoh a ngamh lonak a chimmi zong theih khawh a si.  Chin hriamtlai phu sin ah hriamnam a chiami Captain Min Kaung Htet le ralkap pakhat cu Chin hriamtlai phu nih ṭha tein an zohkhenh hna, tiah theih a si. Photo Crd.

SAC Ralkap Nih Khampat Khua An Luhhnawh Ṭhan Lai Ti Thawng A Than Caah Khuami Thinphang In An Um 5 December 2023 Mizapi ralkap nih an laak cangmi Khampat khua cu SAC ralkap nih luhhnawh in laak ṭhan an i tim, ti thawngpang a than caah khuami hna cu thinphang ngai in an um kong Khampat khuami nih The Chin Post ah an chim. Kan hnuzarh cawnnirukni, December 2 khan SAC ralkap 80 tluk hrawng cu nichuahlei Letsekhan phak hlan Hmuntha khua in

meng li hrawng aa hlatnak hmun an rak phan. Hmuntha khuami hna cu an himnak ding ah KIA le PDF nih nunau le ngakchia hna cu Khampat khua lei an i ṭhial ah a ṭha lai an ti hna i, cu zan ah cun Khampat no. 2 lei ah an i dor hna. No. 4 lei chungkhat sin zong ah aa dor mi an um, tiah khampat khua pakhat nih The Chin Post ah a chim. SAC ralkap pawl hi Khampat nichuahlei ah an lut i lo a riak mi zong SAC ralkap nih an tlunter dih hna. Atu i a rak ra mi

SAC ralkap hna hi Kalay lei um SAC ralkap an si lai, tiah zumh a si. Tamu lei zong in atu hi SAC ralkap nih an vun nor hna i Thantapin khua an phan cang, inn zong an khangh len, tiah Khampat khuami pakhat nih The Chin Post ah a chim. Hi bantuk in SAC ralkap nih Khampat khua luhhnawh an timh thawng a thang nain khua chuaktak in a zaam mi a um thawng theih a si lo.