Thawngpangthar: Tuzing ah kan pasaltha ttangtti phu hna nih SAC Ralhrang Camp 5 an laak khawh, thi le hliam zat an langhter colh

Thawngpangthar: Shan chak lei Hriamtlai Ṭangṭi Phu Nih Shan Ramkulh Ah SAC Ralkap Sakhan 5 An Laak Chap 21 Nov 2023 Shan ramkulh chaklei Monekoe, Pansai, Theinni, Nanpung le Kokang, Shishan hmunram um Yunmarlin khua Tungshan hmunram ah SAC ralkap le chaklei hriamtlai ṭangṭi phu thum hna cu November 19-20 tiang an i kap i, ṭangṭi phu nih sakhan 5 an laak khawh, tiah theih a si.  Kokang hmunram Yunmarlin khua sakhan, Lanthang, Shiohthamchin le

Lushwe um SAC ralkap sakhan cu MNDAA nih an kah i an laak khawh pinah hriamnam le zen-kuan cheukhat zong an laakpiak hna, tiah Tachileik News Agency nih a ṭial.  November 19 ah Monekoe hmunram ah SAC ralkap le an kuttang palik pawl nih umhmun an khuarnak Pansai ramri gate cu ṭangṭi phu nih

an laak khawh.  November 20 ah Tungshan hmunram um SAC ralkap sakhan cu ṭangṭi phu nih an laak i Shishan hmunram Tarshwethang khuakomh zong ah kahdohnak a zual ngai, tiah theih a si. Atu tiang ah chaklei hriamtlai ṭangṭi phu thum nih SAC ralkap sakhan 158 an laak khawh cang

Kan Laitlang Paletwa Peng,Miza Khua Ah SAC Nih Jet Fighter In Bomb A Thlak Caah Minung 7 Hliam An Tuar. November 21,2023 Chin ramkulh,Paletwa peng Miza khuate cu SAC ralhraang nizan November 20 zanlei slm 4 tluk ah jet fighter in bomb a thlak caah tualchung mi mizapi minung 7 hliam an tuar tiah tualchung mi hna sin in

theih a si. “November 20 zanlei slm 4 tluk ah bomb a thlak hi a si.Khuachung ah zeibantuk kahdohnak zong a um lo.hliam a tuar mi chung ah ngakchia le tar lei sang zong an i tel” tiah tualchung mi pakhat nih zalen ah a chim. Miza khuate ah hliam a tuar mi hna hi an hliam a fah ngai caah nunnak tiang thin phang dirhmun zong an um hna tiah theih a si.

Kalaymyo Kahdohnak Ah Tualchung Mi 2 Nunnak A Liam! 21 Nov 2023 Kalaymyo, Duwaichaung khua ah umhmun a khuarmi SAC ralkap pawl cu PDF ṭangṭi phu nih an kah hna i kahdohnak a chuak. Kahdohnak ah SAC ralkap nih hriamngan an kah ruangah Duwaichaung khua chung ah a tla i inn cheukhat a rawh pinah kum 4 tluk Tg Mung Sawm Sang le kum 40 hrawng Pu Huam Ling Thanga an nunnak a liam pinah minung 3 hliam an tuar, tiah theih a si.  Mung Sawm Sang cu

meithal thawng le hriamngan thawng ṭih ruangah an inn pawng ah i thup dingin a kal lioah hriamngan kuan cu a pawng ah a tla i a lu ah hriamngan kuan choiper nih a khen ruangah a nunnak a liam, tiah Zalen nih a ṭial.  Tualchung mi pakhat nih cun, SAC ralkap nih umhmun an khuarnak hi sang chung ah a si i tualchung hriamtlai phu nih an kah hna lioah siarem lo ngai in an kah hna, tiah a chim.  SAC ralkap nih hriamngan an kah tuk caah

Duwaichaung khua telh in Nyaungtaw, Hanthar, Hnetpyutaw, Pinkhongyi, Pyitawthar le Letpanchaung khuami hna zong ralhrial in an zaam dih, tiah theih a si.  Letpanchaung khua um Sevenday Biakinn zong hriamngan kuan nih a tlak i Biakinn a rawh pinah an Pastor zong hliam a tuar ve, tiah theih a si.

Kennedy Tlang Cung SAC Sakhaan Laak Kahdoh Nak Ah PDF Zoland Pasaltha pakhat Nunnak Liam. November 21,2023 Chin ramkulh,Tedim peng Kennedy tlang cung um SAC sakhaan cu PDF Zoland nih nihin zinglei sang ah an laak khawh i hi sakhaan laak kahdoh nak ah PDF zoland in pasaltha Salai Kam Lian Pau nunnak a liam tiah theih a si. Kennedy tlang cung um SAC sakhaan cu kan va kah hna i ralhraang tamdeuh cu

an zam hna. ralhraang a tlawmbik minung 2 an thi,pakhat a nung in kan tlaih.a zam mi cu kan kawl cuahmah hna tiah PDF Zoland nih an thanh. Hi sakhaan laak kahdoh nak ah PDF Zoland in pasaltha Tg.Kam Lian Pau nih ram le miphun caah a nunnak a pek.SAC nih Mi-35 hmang in kahdoh nak a kan tuah ko nain kan him tiah an langhter.  Hi sakhaan laak nak ah PDF Zoland nih 40MM le hriamngan kuan cheukhat telh in kuanzen tampi an laak tiah theih a si.

Kalaymyo, Tahan Ah SAC Ralkap Le Tualchung Ralkap Ṭangṭi Phu Kar Kahdohnak A Chuak. 21 November 2023 Sagaing ramṭhen, Kalaymyo Tahan sang thlan hmun pawng ah umhmun a khuarmi SAC ralkap cu CDF KKG le ṭangṭi phu nih an kah hna, tiah theih a si. “Zahan November 20 zan in SAC ralkap pawl cu kan kah hna i nihin November 21 zinglei tiang kan kah hna. Cu kahdohnak ah PDF ralkap pakhat nih ram le miphun ca ah a nunnak a pek. A ruak zong ṭha tein

ralhmai a kalmi hna nih an fimhlawm i, hnu an kir cang hna,” tiah CDF KKG in ṭuanvo ngeitu pakhat nih The Chin Post ah a chim. Tahan thlan hmun pawng ah umhmun a khuarmi SAC ralkap kahdohnak ah SAC ralkap lei in a thimi le aa hliammi an um le um lo a fiang rih lo. Kan ralkap hna hnu an kir lio a si caah fiang tein thawngpang theih khawh a si rih lo, tiah a chim chap. Kalaymyo um SAC ralkap nih hriamngan an kah tuk caah Letpanchaung khua lei zong ah a va tla. Letpanchaung khua tu ahcun

kahdohnak a chuak lo. CDF KKG le ṭangṭi phu nih SAC ralkap sakhan cheukhat zong kan kah cuahmah lio a si, tiah CDF KKG in ṭuanvo ngeitu pakhat nih cun The Chin Post ah a chim. Nihin November 21 ah PDF Zoland nih Tedim ram chung um Kennedy tlang SAC ralkap sakhan pakhat zong an laak tiin thawng theih a si. Mi cheukhat nih zahan November 20 ah an laak cang. Sakhan an laak lioah SAC ralkap pawl cu an um ti lo tiin a chimmi zong an um. Hi kong ah The Chin Post nih fehternak kan tuahmi a um rih lo i thil sining kan hlathlai cuahmah.