A poi tuk ee: Tuchun CDF pasaltha hna le SAC Ralhrang kar kahdoh ruang ah kan Laimi minung 2 nih an kan thih taak e

Kalaymyo Kahdohnak Ah Tualchung Mi 2 Nunnak A Liam! 21 Nov 2023 Kalaymyo, Duwaichaung khua ah umhmun a khuarmi SAC ralkap pawl cu CDF ṭangṭi phu nih an kah hna i kahdohnak a chuak. Kahdohnak ah SAC ralkap nih hriamngan an kah ruangah Duwaichaung khua chung ah a tla i inn cheukhat a rawh pinah kum 4 tluk Tg Mung Sawm Sang le kum 40 hrawng Pu Huam Ling Thanga an nunnak a liam pinah minung 3 hliam an tuar, tiah theih a si.  Mung Sawm Sang cu meithal thawng le

hriamngan thawng ṭih ruangah an inn pawng ah i thup dingin a kal lioah hriamngan kuan cu a pawng ah a tla i a lu ah hriamngan kuan choiper nih a khen ruangah a nunnak a liam, tiah Zalen nih a ṭial.  Tualchung mi pakhat nih cun, SAC ralkap nih umhmun an khuarnak hi sang chung ah a si i tualchung hriamtlai phu nih

an kah hna lioah siarem lo ngai in an kah hna, tiah a chim.  SAC ralkap nih hriamngan an kah tuk caah Duwaichaung khua telh in Nyaungtaw, Hanthar, Hnetpyutaw, Pinkhongyi, Pyitawthar le Letpanchaung khuami hna zong ralhrial in an zaam dih, tiah theih a si.  Letpanchaung khua um Sevenday Biakinn zong hriamngan kuan nih a tlak i Biakinn a rawh pinah an Pastor zong hliam a tuar ve, tiah theih a si.

Kennedy Tlang Cung SAC Sakhaan Laak Kahdoh Nak Ah PDF Zoland Pasaltha pakhat Nunnak Liam. November 21,2023 Chin ramkulh,Tedim peng Kennedy tlang cung um SAC sakhaan cu PDF Zoland nih nihin zinglei sang ah an laak khawh i hi sakhaan laak kahdoh nak ah PDF zoland in pasaltha Salai Kam Lian Pau nunnak a liam tiah theih a si. Kennedy tlang cung um SAC sakhaan cu kan va kah hna i ralhraang tamdeuh cu

an zam hna. ralhraang a tlawmbik minung 2 an thi,pakhat a nung in kan tlaih.a zam mi cu kan kawl cuahmah hna tiah PDF Zoland nih an thanh. Hi sakhaan laak kahdoh nak ah PDF Zoland in pasaltha Tg.Kam Lian Pau nih ram le miphun caah a nunnak a pek.SAC nih Mi-35 hmang in kahdoh nak a kan tuah ko nain kan him tiah an langhter.  Hi sakhaan laak nak ah PDF Zoland nih 40MM le hriamngan kuan cheukhat telh in kuanzen tampi an laak tiah theih a si.

Kalaymyo, Tahan Ah SAC Ralkap Le Tualchung Ralkap Ṭangṭi Phu Kar Kahdohnak A Chuak. 21 November 2023 Sagaing ramṭhen, Kalaymyo Tahan sang thlan hmun pawng ah umhmun a khuarmi SAC ralkap cu CDF KKG le ṭangṭi phu nih an kah hna, tiah theih a si. “Zahan November 20 zan in SAC ralkap pawl cu kan kah hna i nihin November 21 zinglei tiang kan kah hna. Cu kahdohnak ah PDF ralkap pakhat nih ram le miphun ca ah a nunnak a pek. A ruak zong ṭha tein ralhmai a kalmi hna nih

an fimhlawm i, hnu an kir cang hna,” tiah CDF KKG in ṭuanvo ngeitu pakhat nih The Chin Post ah a chim. Tahan thlan hmun pawng ah umhmun a khuarmi SAC ralkap kahdohnak ah SAC ralkap lei in a thimi le aa hliammi an um le um lo a fiang rih lo. Kan ralkap hna hnu an kir lio a si caah fiang tein thawngpang theih khawh a si rih lo, tiah a chim chap. Kalaymyo um SAC ralkap nih hriamngan an kah tuk caah Letpanchaung khua lei zong ah a va tla. Letpanchaung khua tu ahcun

kahdohnak a chuak lo. CDF KKG le ṭangṭi phu nih SAC ralkap sakhan cheukhat zong kan kah cuahmah lio a si, tiah CDF KKG in ṭuanvo ngeitu pakhat nih cun The Chin Post ah a chim. Nihin November 21 ah PDF Zoland nih Tedim ram chung um Kennedy tlang SAC ralkap sakhan pakhat zong an laak tiin thawng theih a si. Mi cheukhat nih zahan November 20 ah an laak cang. Sakhan an laak lioah SAC ralkap pawl cu an um ti lo tiin a chimmi zong an um. Hi kong ah The Chin Post nih fehternak kan tuahmi a um rih lo i thil sining kan hlathlai cuahmah.

Kennedy Tlang Ah Umhmun A Khuarmi SAC Ralkap Sakhan PDF-Zoland Nih An Laak. 21 Nov 2023 Chin ramkulh, Tedim peng Kennedy tlang ah umhmun a khuarmi SAC ralkap sakhan cu PDF-Zoland nih nihin November 21 zinglei ah an laak, tiah theih a si.  SAC ralkap 30 hrawng nih umhmun an khuarnak Kennedy tlang SAC ralkap sakhan cu tuzing suimilam 7:00 hrawngah kan laak, tiah PDF-Zoland in ṭuanvo ngeitu pakhat nih Khonumthung ah a chim.  Zing suimilam 4:00 ah Kennedy sakhan cu

PDF-Zoland nih an kah i suimilam 7:00 tluk ah sakhan cu an laak khawh. SAC ralkap pahnih an thi i pakhat an tlaih pinah 40/60 mm telh in hriamnam le zen-kuan zong an laakpiak hna. A dang SAC ralkap cu an zaam dih, tiah PDF-Zoland sinin theih a si.  India-Myanmar No. 2 ramri a simi Kalay-Tedim motor lam pawng ah a ummi Kennedy tlang cu Chinram tlang sang bik pahnihnak a si i Chinram chung SAC ralkap sakhan lakah a biapi ngaimi sakhan pakhat a si.