Thawngpangthar: Tuchun kan pasaltha hna nih SAC Ralhrang Palik camp an laak khawh, hriamnam tampi an laak

Thawngpangthar: Nawngchu peng SAC palik camp 4 TNLA le MDY PDF nih an lak. Pyi Oo Lwin he ai naih ngai mi Shan ram Nawngchu peng SAC palik camp 4 cu TNLA le PDF fonh nih an lak khawh tiah theih a si. Nawngchu peng ah a um mi Lun Ci, Cu In, Khu Hu, le Kung San palik camp 4 hna cu November 19 ni ah

PSLF/TNLA le MDY PDF nih an va kah hna caah an lak tiah an langhter. Kahdohnak SAC ralkap a thi le hliamtuar zat langhter mi a um lo nain meithal phunphun zuun 100 renglo le hriamnam dangdang an lak chih. Hriamnam an lak mi hna cu MA-11 meithal zuun 50, MA-12 9, MA-5 13, Shot Gun 32, 5.56 kuan 82458, 9 mm kuan 511, 12 Bolt kuan 1592 le thilri dangdang hna an si tiah NUG nih a langhter.

A sunglawi taktak: Kyaikmaraw, Chaung-na-khua Ah A Kai Mi Ralkap Pawl Kahdohnak Ah Hriam Tampi An Lak. 2023 November 20 — Mon ram, Kyaikmaraw peng, Chaung-na-khua ah a rak kai mi ralkap pawl cu dothlennak phu pawl nih an kah hna i ralkap ruak pakhat le hriam tampi an lak khawh tiah dothlennak phu pawl nih an thanh. November 17 zaan sml 11:00pm ah Chaung-na-khua ah a rak lut mi ralkap pawl cu dothlennak phu pawl nih

an kah hna, ralkap lei a thi mi an tam caah hnu an kir ṭhan, cu ni ah dothlennak phu pawl nih hmunhma zohfelnak an va tuah i ruak 1 le hriam tampi an lak tiah theih a si. KNU, PDF phu pawl nih Kyaikmaraw peng, Chuang-na-khua hlei an lak hnu ah ralkap nih vanlawng in bom a thlak, pehzulh in kahdohnak an tuah tiah theih a si.

Kalaymyo Ah Datsi Gallon Khat Ah Kyats 28,000 Tiang A Phan. 20 Nov 2023 Sagaing ramṭhen, Kalay peng ah November zarhkhatnak thawk in Maharmyaing lam a awn lo caah datsi gallon khat ah kyats 28,000 tiang a phan, tiah tualchung mi hna nih an chim. Cheukhat datsi dawr ah cun duh zat poh in cawk a ngah ko. Cheukhat dawr tu ahcun 10,000 man lawng cawk khawh a si. Thawl khat ah kyats 8,000 a si i gallon khat ah 28,000 tiang a phan, tiah tualchung mi pakhat nih

Chin World ah a chim.  Maharmyaing lam a rak awn lio zong ah Kalaymyo ah datsi thawl khat ah 4,500 a rak si i Yangon, Mandalay datsi man he tuak ahcun let hnih in a man a kai. SAC nih nawlngeihnak an laak hlan ah Kalaymyo le Chin ramkulh chaklei, Kalay-Gangaw, Kalay-Kalewa(Maharmyaing) le Kalay-Kalewa(Yargyi) lam hman khawh a rak si ko nain atu lio ram boruak ruangah Maharmyaing lam lawng hman khawh a si i Maharmyaing lam a awn lonak thla khat deng a si cang, tiah theih a si.

Tibual Sakhan In A Zaammi SAC Ralkap 29 Cu Vaphai Khua In Manipur Lei Ah Helicopter In An Kalpi Hna. 19 November 2023 A luancia November 15 ni ah Falam peng Tibual sakhan in Mizoram lei ah a rak zaammi SAC ralkap 29 cu Vaphai khua in India ralkap Helicopter nih Manipur lei ah a kalpi hna, Manipur in Myanmar lei ah an kalpi hna lai zumh a si. Chin ramkulh, Falam peng Tibual sakhan in a zaammi SAC ralkap 29 cu Assam Rifles nih Mizoram, Vaphai khua ah

ni 5 tluk an zohkhenh hna hnu nihin November 19, zinglei suimilam 11 hrawng ah Indian Air Force Helicopter 2 in Manipur lei ah an kalpi hna kong All India Radio news Aizawl nih a ṭial. Hi kong he pehtlai in Vaphai khuachung ummi pakhat nih cun, “India Helicopter cu voi 3 hrawng a rak ra i, kan zumhnak ah Tibual sakhan in a rak zaammi SAC ralkap pawl an thiar hna a si lai. A ruang cu; cu hlan ah nihin bantukin Helicopter a ra bal lo. India Helicopter cu

Champhai lei ah a zuang i Manipur lei ah a ṭumpi ṭheo lai, tiah zumh cio a si ko,” tiah The Chin Post ah a chim. “Tibual sakhan in a zaammi SAC ralkap 29 cu Vaphai khua an phanh hnu ah nikhua a chia peng i, cu ruang ah Helicopter nih a laak khawh hna lonak a si lai. Nihin cu nikhua a vun i hawk i khua a ṭhat ngai caah an vun laaknak hna a si kan zumh,” tiah Vaphai khua ummi pakhat nih cun a chim chap

Zualko: November 20th,2023-CNDF Pasaltha  Salai Lal Duh Kim ( kum 22 ) cu nizan suimilam 8:00 PM ahkhan ral ram ah ram le miphun nunnak a pek. Chin Hill ram Falam Township Var Sakhan cu operation 1027 ruang ah an zam dih i, November 16 ahkhan mipi ralkap CNDF hna nih SAC Var Sakhan cu va thianh hlimh rian an tuan lio ah  SAC ralhrang hna nih cun an camp ah Bomb an ral kamh I CNDF minung 3 bak hliam an tuar tiah kan theih. Hliam tuar pathum cu

a ran khawh chung in Siizung panhpi an si i, minung 2 cu an hliam a faak tuk lem lo caah pakhathliam faak bik a ke a bulmi Salai Lal Duh Kim cu  vanchiat ah nizan suimilam 8:00 PM hrawng ah khan a nunnak aliam tiah kan theih. Bawipa nih a chungkhar sahlawh dihlak hnem ko hna sehlaw. Pasaltha salute..RIP