Zualko: Falam peng kahdohnak ah CNDF pasaltha Salai Lal Duh Kim nih a kan thih taak ee
Zualko: November 20th,2023-CNDF Pasaltha Salai Lal Duh Kim ( kum 22 ) cu nizan suimilam 8:00 PM ahkhan ral ram ah ram le miphun nunnak a pek. Chin Hill ram Falam Township Var Sakhan cu operation 1027 ruang ah an zam dih i, November 16 ahkhan mipi ralkap CNDF hna nih SAC Var Sakhan cu va thianh hlimh rian an tuan lio ah
SAC ralhrang hna nih cun an camp ah Bomb an ral kamh I CNDF minung 3 bak hliam an tuar tiah kan theih. Hliam tuar pathum cu a ran khawh chung in Siizung panhpi an si i, minung 2 cu an hliam a faak tuk lem lo caah pakhathliam faak bik a ke a bulmi Salai Lal Duh Kim cu vanchiat ah nizan suimilam 8:00 PM hrawng ah khan a nunnak aliam tiah kan theih. Bawipa nih a chungkhar sahlawh dihlak hnem ko hna sehlaw. Pasaltha salute..RIP Crd; Zofa Journal
Breaking News Lailenpi SAC Sakhaan CNA le Ttangti Phu Nih An Kah,SAC Nih Jet Fighter A Hman. November 20,2023 Chin ramkulh, Matupi peng Lailenpi SAC ralhraang sakhaan cu CNA le ttangti phu hna nih nizan November 19 chun thok khan drone in bomb an thlak hna i an doh hna tiah theih a si. “Nizan chun hrawng khan Drone hmang in bomb kan va thlak hna.Drone in a si caah an kan kap kho ve lo i tuzing November 20 zinglei slm 9:00 tluk ah jet fighter in
bomb lung 3 a rak thlak leng ah hriamngan zong lung hnih thum cu an kah. Kan mah lei in biatak tein kan kah mi hna a um rih lo” tiah CDF-Mara in rian ngeitu pakhat nih Khonunthung Burmese ah a chim. SAC ralhraang hna i jet fighter nih kah ruang ah Lailenpi khua chung biakinn pakhat aa rawk tiah theih a si i khuami hna cu kaphnih kar kahdoh nak a cuah hlan ah an khua an chuahtak hna tiah theih a si. Lailenpi ralhraang hna sakhaan kah nak cu Chin National Army – CNA, CDF Lautu, CDF-Matupi,CDF-Mara le CDF-Zophei hna ttangti in an kah mi hna a si i kaphnih kahdoh nak fak piin a chuak kho mi a si caah mizapi umkal ralrin cio a herh lai tiah a chimchih.
CNDF Nih Tibual Sakhan An Laak Hnu Ah SAC Ralkap Thantar An Hrawh I CNDF Thantar An Thlai. The Chin Post | 19 November 2023 Chin ramkulh, Falam peng, Tibual SAC ralkap sakhan cu CNDF nih an laak hnu ah SAC ralkap nih an rak thlaimi thanthar cu an hrawh i CNDF thantar an thlai, tiah theih a si. CNDF nih
Tibual sakhan an laak khawh hnu ah sakhan sakremhnak an ngei i JCB hmang in hmunram thianhfelnak zong an tuah, tiah theih a si. SAC ralkap nih an chuahtakmi Tibual sakhan chung ah an kaltakmi hriamnam zeimawzat cu CNDF nih an laak i, rawlruk chung ah facang dip 61 le eidin dang pawl zong an laak khawh. Cu pin ah innzuat saṭil vok le ar zong an rak laak hna kong CNDF nih an rak thanh.
Yetashi Peng Ni Hnih Chung Kahdohnak Ah SAC Ralbawi Pakhat Telh In Ralkap 27 An Thi. 18 November 2023 Bago ramṭhen Yetashi peng, Pihtaukkone khuakomh, Yetashilay khua le Pitaukkone khua thlanglei ah ni hnih chung kahdohnak a chuak i SAC ralkap ralbawi pakhat telh in ralkap 27 an thi, tualchung hriamtlai phu in minung 3 an nunnak a liam ve, tiah Taungngu pengkomh tualchung hriamtlai phu in ṭuanvo ngei pakhat nih Yangon Khit Thit Media ah a chim. Nihin November 18, zinglei 5:00 hrawng ah Yetashi peng Yitashilay khua le Pitaukkone khua thlanglei ah
hmunram thianhfelnak a tuahtu tualchung hriamtlai phu le SAC ralkap kar kahdohnak a chuak i kaphnih kar kahdoh lioah vanlawng le hriamngan in ralkap pawl cu kahdoh an bawmh hna, tiah theih a si. Cu pin ah Swa khua Khah-Mah-Yah 19 ralkap nih 120mm hriamngan in voi hra hrawng kah an bawmh hna, Kaetuhmani khuathar van ralkap hna nih MI 35 in zinglei suimilam 10:00 hrawng ah seh meithal he voi 2 kahdoh an bawmh ve hna, raltuknak vanlawng in
zinglei suimilam 11:00 hrawng ah bomb le seh meithal he voi 3 kah an bawmh hna, tiah theih a si. Cu kahdohnak ah cun SAC ralkap Khah-La-Yah 84 ralbawi pakhat telh in ralkap 27 an thi i hliam a pumi an tam. Tualchung hriamhlai phu lei i minung 3 nih an nunnak an pek i a cheu hliamtuar an um ve, tiah theih a si. Yitashi peng chung kahdohnak a fah ruang ah tualchung mi 500 tluk cu ral an zaam. SAC ralkap nih hriamngan le vanlawng in kahdohnak an tuah ruang ah kum 5 ngakchia pakhat telh in tualchung mi 3 hliam an tuar i inn a rawkmi zong a tam ngai, tiah theih a si.