Thawngpangthar: SAC Ralhrang Gate ah kan pasaltha hna nih an va kah caah Ralhrang hi zat an thi
Loikaw hauka SAC camp ah Karenni ralkap nih an laak mi hriamnam an langhter. November 18, 2023. Karenni khualipi Loikaw khua luh hauka, Kayan Tharyar lampial SAC camp cu Karenni ralkap phu komh nih an rak laak i, cuka camp ah an laak mi hriamnam pawl cu NUG Runvennak Minister Zung nih nihin ah a langhter. Karenni hriamtlai phu nih “Operation 11.11” cu 2023 November 11 in an thawk i SAC camp tam pi an laak hna. Cu operation ah cun
KA, KNDF, DMO-Local PDF, Urban Guerrilla phu hna le Central War Zone, Southern Shan-Karenni Command kut tang Loikaw PDF, Mobye PDF, Phekon PDF, Hpruso PDF, Demawso PDF le Southern Shan PDF an i tel tiah NUG Runvennak Zung nih a langhter. Photo: MoD (Loikaw khua luh hauka ah an laak mi SAC hriamnam pawl
Patlelin Khua Kahdohnak Ah SAC Ralkap 10 An Thi, Palik Pakhat An Tlaih. 18 Nov 2023 Mandalay ramthen, Madaya peng Patlelin khua ah umhmun a khuarmi SAC ralkap cu tualchung hriamtlai phu nih an kah hna i ralkap 10 an thi, palik 1 kan tlaih, tiah NUG runvennak No. 1 nih an thanh. November 16 ah Madaya peng Patlelin khua ah
umhmun a khuarmi SAC ralkap ralbawi Captain Kyaw Hein nih a hruaimi SAC ralkap 50 hrawng cu PDF, Sinku peng Pah Kah Phah le Madaya Pah Kah Phah nih an va kah hna, tiah Khit Thit Media nih a ṭial. Cu kahdohnak ah cun SAC ralkap 10 an thi i 5 hliamhma an pu. Palik 1 tlaih a si i meithal zun 3, meithal kuan 49 le
kuanbawm 7 an laakpiak hna. Patlayin ah raltuk bawm dingin a kalmi SAC ralkap Lah Kah Tah 1014 nih Aungkanthar khua Arthit lakphak dawr cu a ruang um loin meithal in an kah caah tualchung mi 11 an nunnak a liam pinah Puaisakone khuami pakhat zong an thah, tiah theih a si.
MNDAA Nih Kokang Pengkomh SAC Ralkap Sakhan 4 An Laak Chap, Sakhan 152 An Laak Cang. 18 November 2023 Shan ramkulh chaklei, Kokang pengkomh chung SAC ralkap sakhan 4 cu Kokang MNDAA nih an laak chap i ralkap sakhan 152 an laak khawh cang, tiah MNDAA thawngzamhnak The Kokang nih an thanh. November 16, zinglei 5:30 ah Kokang pengkomh, Tonshan hmunram SAC ralkap sakhan cu MNDAA nih an kah i suimilam 6 chung kaphnih kar an i kahdoh hnu suimilam 11:30am ah an laak khawh. Cu ni zanlei 3:15 ah MNDAA nih Kokang pengkomh, Shishan hmunram SAC ralkap sakhan cu
an kah ṭhan i minute 25 chung ah an laak khawh, tiah theih a si. Nizan November 17 ni ah Kokang pengkomh, Shishan hmunram Chinchomthan khua pawng SAC ralkap sakhan 1 cu MNDAA nih an laak khawh ṭhan i, cu ni ṭhiamṭhiam zanlei suimilam 2:37 ah Chinchomthan khua pawng SAC ralkap no. 2 sakhan cu an laak chap, tiah theih a si. Shan ramkulh chaklei ah an kalpi cuahmahmi 1027 Operation a ni 22nak ni tiang ah Kokang MNDAA nih SAC ralkap sakhan 152 an laak khawh cang i Operation kahdohnak ngol lo in an kalpi cuahmah rih, tiah theih a si.