Mizoram Chung Motor Eksiden Ah Minung 6 An Thi.

(Note : Zahan update kan tuah lio ah khan pa5 an thi i, asinain a hnu deuh ah sizung ah pakhat hi a thi than ve tiah thawng kan theih. Bawipa nih mithi chungkhar umpi ko hna seh) Mizoram Chung Motor Eksiden Ah Minung 6 An Thi.

Nizan November 22, Chunhlan suimilam 10:10 ah khan Mizoram chung, Khawzawl District, Aiduzawl khuami hna cu an khua pawng, Rabung khua mitthi thutpi ding an kal lioah an kalnak motor Mahindra pick-up cu lam thlanglei ah a liam. Hi tonsualnak ah hin minung 6 nunnak a liam.

Khawzawl palik nawlngeitu hna chimning ahcun motor ah hin minung 19 an i cit i, Rabung khua luh hlan km 1 hrawng lamchuk an tum lioah, lam thlanglei ah an liam. Lampi in pe 30 hrawng ah an tla i, hi chiat an tonnak aruang bik cu an motor mawnghnak steering a thatlo ruangah a si, tiah an chim.

Motor Eksiden-nak ah hin minung pali F. Vanlaldinga(kum 56), Lalsawta(kum 54), Zahliri(kum 47), le Lalruatkimi(kum 40) hna cu a hmuncia ah an thi colh. Zonungsangi(kum 45) cu Rabung sii-inn an phanhpi hnu ah a thi colh ve, zanlei sang suimilam 3:15 hrawngah Lalbuatsaihi zong a thi than, tiah kan theih. Motor Eksiden-nak i hliamhma a pu mi midang 8 hna cu Aizawl lei ah tlikpi an si i, midang 3 cu Rabung sii-inn ah zohkhenh an si.

Motor tonsualnak i a thi mi hna hi anmah Aiduzawl khua ah, nizan zankhua an deipi hna i, nihin ah khan an vui hna. Aiduzawl khua hi khua hmete inn 61 umnak a si i, minung 326 an um, tiah kum 2011 India ram milurelnak nih a langhter.

Credit : The Chin Post