misual Zahhngal Lo Ralhraang SAC Nih Matupi Ah Sianginn Hun A Timh!

Matupi Ah SAC Nih Sianginn Hun A Timh!

“SAC nih Chin ramkulh, Matupi ah 2022-2023 cacawn kum sianginn hun a timh. Grade 5 le Grade 8 cawn ning thar chimh cawnpiaknak training an kai,” tiah CDM tuahmi siangcachim(sayamah) pakhat nih a chim. Cawn ning thar chimh cawnpiaknak cu Matupi peng Head of Education Ṭin Luai inn ah an tuah i an dih cang, tiah theih a si. Tualchung mi nih an chim ning ah, “Head of Education(ပညာရေးမှူး) zung hlun ah bomb a puah caah Ṭin Luai cu zung a kai ngam ti lo. A herh mi zung rian kong cu a inn ah a tawlrel,” tiah an chim

Cheukhat cu a ruang tampi ruang ah CDM tuah an ngol i zung rian an lut ṭhan hna. Cu kong he pehtlai in CDM sayamah pakhat nih, “Mah le lung i thlen ning cio a si ko. Kannih zong kan har tuk ko, aho hmanh tangka tampi ngeih in CDM tuah mi kan um lo. Kan zeizong vialte kaltak in CDM kan tuah. CDM a tuah ko nain zung rian a lut ṭhan mi hna kong ah zeihmanh chim ding a um lo,” tiah a chim. Matupi ah sianginn hun ṭhan an timh ko nain Matupi peng khuate hna cu CDF nih an uk caah SAC ralkap nih sianginn hun an i tim lo, tiah theih a si.

Relchap:  Mizoram Khualipi Aizawl Ah Myanmar Rammi Nih Thi Hlutnak An Tuah lai

India ram, Mizoram khualipi Aizawl ah Myanmar rammi nih thi hlutnak cu May 18 ah an tuah lai, tiah theih a si. Thi hlutnak ding hruaitu pakhat nih, “Aizawl Sii-iin pi ah thi hlut ding kan i tim. Mizoram a phan mi Myanmar ram mi kan zawtfah caan ah Aizawl Sii-inn pi ah kan i thlop tawn hna. Atu zong Sii-inn nih thi an herh ngai tiah kan theih caah thi hlut kan i timhnak a si,” tiah a chim.

Myanmar ram mi tam deuh cu Aizawl Sii-inn ah an i thlop. Private Sii-inn cheukhat ah an i thlop ko nain, thi khon khawhnak caah thi Bank a um lo i cawk a hau, tiah theih a si. May 18 zing sml 10:00 in zanlei 1:00 tiang thi hlutnak hmun cu Cival Hospital kam Dawrpui Multipurpose Center ah a si lai. Thi hlut khawhnak ding a tawlreltu hi mino hruainak in a si. Thi hlutu hi minung 150 hrawng i ruahchan a si i, atu tiang ah 100 hrawng min an i pe cang.

Lam hla in thi hlut a duh mi hna ca ah thlah le donnak cu motor ngei hna nih man in laak lo(free) tein an hmanter hna lai. Um ṭhutnak le ihkhun hna zong tualchung bukip hna nih an bawmh hna, tiah theih a si. SAC ralkap nih hramhram in uknak a laak hnu in Mizoram ah a zammi Myanmar rammi hi 40,000 hrawng an si cang. India ram central cozah nih cun ralzam cohlan a duh lo nain ramkulh cozah, biaknak lei, zatlang bu le pumpak cio in an bawmh hna i an zohkhenh hna, tiah theih a si.

Relchap:  Mizoram Cozah Nih Tanghra Exam Result A Chuah, Ralzaam Sianghngakchia Tampi Nih Hlawhtlinnak An Hmuh

Nihin(May 17) chun suimilam 12 ah khan Mizoram Board Of School Education (MBSE) nih High School Leaving Certificate (HSLC), tanghra exam result 2021 (sungh/awn) a chuah i a pumpi ah Dinsawmkimi, St Joseph Higher Secondary School, Aizawl i a cawnglio mi le Lalramdina Ralte, St Paul’s Higher Secondary School, Aizawl i a cawnglio mi hna cu pakhatnak an si. An pahnih in mark 500 ah mark 486 an hmuh veve.

Tukum tanghra exam ah aa tel mi Sianghngakchia 17,417 lak ah 12,304 nih hlawhtlinnak an hmuh i, hlawhtlinnak a hmu zat hi (zatuak in) 70.64% a si. Hlawhtlinnak hmu kho loin a sung mi 4,928 an um. Tutan hlawhtlinnak a hmu mi lak ah 1437 cu Distinction in an awng i, First Division ah 3716, Second Division ah 4309 le Third division ah minung 2842 hna nih hlawhtlinnak an hmuh.

Myanmar ram buai ruangah Sianghngakchia tampi cu ralzaam dirhmun phan in Mizoram ah sianginn a peh mi District kip ah an um i, tutan tanghra exam ah hin mi tampi nih hlawhtlinnak an hmuh, tiah theih a si.

Kum 2021 Tanghra exam result chuak ah hlawhtlinnak a hmu mi lawmhpinak le a sung mi hna tuarpinak ah Lai Students’ Association, General Headquarters Lawngtlai nih cathanh an chuah i, LSA General Headquarters Lawngtlai nih cun tanghra exam ah hlawhtlinnak a hmu mi vialte hna cu an lawmhpi hna leng ah hmailei caan ah lungsau te in an cacawnnak pehzulh ding le ram le miphun ca ah zohchunh awktlak si ding in duhsaknak an hlanh hna.Credit – The Chin Post