MINO HNA SINAH BIAHALNAK.

MINO HNA SINAH BIAHALNAK

No lioah rethei ngai in riantuan, i zuam i chungkhar dirh hnu, upat hnuah nuam tein khuasak maw na duh deuh, asiloah no lioah nuam ngai in um i upat hnu, chungkhar dirh hnuah retheih ngai in khuasak dah na duh deuh?

Mino tampi nih an chim ka theihmi cu hihi a si. Kan no lio i kan i nuamh lo ah kan tar hnuah maw kan i nuamh lai? Mah bia hi a hmaan ngaimi a lo nain tih a nung ngaimi bia a si. Nihin ni tiang i ka hmuh khawh tawk le ka theih tawk ah a no lioah nuam ngai in a ummi hna hi an upat deuh tikah cun an i ngaichih tuk tawn.

Asinain a no lioah fel tein a ummi, riantuan a huammi, sianginn a kainak zongah hawi hlei in ca aa zuammi hna cu an i zuam lioah har tuk ko hmanhseh chungkhar an vun dirh i an kumkhua a vun upat deuh tikah an khuasak a nuam, a tluang, an tha a dam!

Cucaah nupi/pasal kan ngeih i fanu fapa hna he khua kan sak tik, kan kumkhua a hung upat tikah “Eiiii…ka no lioah khan mu rak i zuam ninglaw cu” tiin ngaihchihnak bia kan chim lo nak dingah kan no lioah fel tein, riantuan huam in, zeipaoh ah i zuamnak lungthin in um hna usih…! July 5, 2021 (Monday) By. Salai CP Lian

Credit : The Chin Post