KNU Hmunram, May Thla Ni 15 Chung Kahdohnak Ah SAC Ralkap 88 An Thi

KNU Hmunram, May Thla Ni 15 Chung Kahdohnak Ah SAC Ralkap 88 An Thi

KNU Brigade 5 hmunram, Mutaw(ဖာပွန်) pengkomh chung umhmun kauhter aa tim mi, SAC ralkap le BGF i fonh cu KNLA Brigade 5 kuttang Battalion ralkap pawl he May 1 in 15 tiang ah voi 186 an i kap. Cu kahdohnak ah SAC ralkap 88 an thi i, 68 hliamhma an pu, tiah KNU nih cathanh an chuah. SAC ralkap motor 3 le an sii-inn pakhat kan hrawh. Ni 15 chung kahdohnak ah KNLA in ralkap 2 an thi i, 2 hliamhma an pu, tiah KNU Brigade 5 nih an thanh.

SAC ralkap le BGF hna nih, mizapi umnak inn le lo ah hriamngan in voi 728 an kah i tualchung mi 1 a thih lengah 8 hliamhma an pu, tiah Mutaw thawng zamhnak nih a langhter.

Pakukko Ah Palik Bawi Chang A Upa Le A Nu Thah An Tong: Magwe ramṭhen, Pakukko khua No.1 sang um, SAC ralkap kuttang palik bawi chang (Deputy Chief of Police) a upa le a nu cu an umnak inn ah meithal in an kah thah hna, tiah tualchung mi nih an chim. Phawngtaw Oo lam le Boyoke lam kam ah um mi palik bawi chang Myo Ko Ko Chit a inn chung ah luhhnawh in, a upa le a nu cu kah thah an si, tiah theih a si.

“Chun hnu sml 2:30 hrawng ah Palik bawi chungkhar thattu hna cu innchung ah an lut i an kah thah hna. Zei ruang ah dah an thah hna ti cu kan hngal lo,” tiah Pakukko khua mi pakhat nih a chim. Palik bawi chang a upa le anu an thahnak kong he pehtlai in PDF nih zeihmanh an thanh rih lo, tiah theih a si.

Relchap:  Khin U Peng Ah SAC Ralkap Nih Inn 23 Le Tualchung Mi 2 Mei In An Khangh Hna!

Sagaing ramṭhen, Khin U peng Theintaw(သိမ်တော်) khua le Innpat khua cu SAC ralkap nih, a ruang um loin an khangh caah khua hnih fonh in inn 23 an ciam i, khua mi 2 zong mei in an khangh hna, tiah Khin U thawngzamhnak nih a langhter.

May 15 zing sml 8:20 hrawng ah Ye U khua in a ra mi SAC ralkap 100 leng nih Shweyamin(ရွှေယမင်း) khua cu an khangh. A pawng kam um mi Theintaw khua zong zing sml 11:45 hrawng ah an khangh i, inn 17 an ciam ve. Ral i khamhnak ca ah an tlaih mi khuami pakhat cu an thah i capawl lakah mei in an khangh. A ruak cu mei nih a kangh tuk caah aho si an hngal lo, tiah theih a si.

May 16 zing sml 10:00 hrawng ah Innpat khua um ralzam mi hna umnak sianginn chung ah, hriamngan le hriamhme he SAC ralkap nih an kah caah PDF nih an kah ve hna i, SAC ralkap lei hliamtuar mi an tam caah mizapi umnak inn 6 an khangh i, capawl an chiah mi hna zong an khangh piak dih hna.

Theintaw khua le Innpat khua cu SAC ralkap nih, hriamngan in an kah caah saṭil a thi mi an um. Inn le lo zong an rawk dih. Khin U peng ah SAC ralkap nih mizapi inn cu atu le atu mei in an khangh piak hna. Ral i khamhnak ca ah khua mi zong an tlaih lengmang hna. Inn ngei lo an tam caah a rannak in bawmh an herh ko, tiah Khin U thawngzamhnak nih a langhter.

Relchap:  Myaing Peng Ah Tualchung Mi 60 Hrawng Tlaih An Tong!

Magwe ramṭhen, Myaing(မြိုင်) peng Ywalay(ရွာလေး) khua mi cu May 13 in 15 tiang ah SAC ralkap nih 60 hrawng an tlaih hna, tiah theih a si. Tlaih a tong mi hna hi May 13 in 16 tiang ah Wyashi(ရွာရှည်), Letyama, Phiahti le Taungkaing(တောင်ကိုင်း) khua mi hna an si, tiah theih a si.

May 13 le 14 ah Letyatma khua mi 23, Taungkaing khua mi 7, Phiahti khua mi 8 tlaih an tong i, May 15 ah Letyatma khua mi 10, Taungkaing khua mi 7 le Pitauhkan(ပိတောက်ကန်) khua mi 6 an tlaih ṭhan hna. An tlaih mi hna chung ah kumtling lo le nu zong an i tel, tiah tualchung mi nih an chim.

Tarpa pakhat nih, “Tlaih a tong mi hna cu an meithal, zen-kuan pawl le thil an fir mi an putter hna. Kum tlinglo ngakchia pa zong bag nganpi an beiter.

Pitauhkan khua tlaih a tong mi hna lakah kum 13 hrawng Htun Htun Win, kum 17 hrawng Kyaw Zin Aung, kum 38 hrawng Aung Kyi Shwe le kum 55 hrawng Htey Win le a fapa hna cu May 16 tiang ah an thlah rih hna lo,” tiah a chim.

“SAC ralkap nih Letyatma khua telh in pawngkam khua 5 ah rallam an sial caah khua mi cu an zaam dih, eidin le ngandamnak lei zohkhenh kan herh tuk,” tiah tualchung mi hna nih an chim.Credit – The Chin Post