GOOD NEWS : YDF Pasaltha Rual Hna Nih Ralhrang Major Pa Telh in Thalo Lak Te An Thah Hna.

Mipi Ralkap YDF nih Ralhrang Major Pa Telh In 11 An thah hna lengah hriamnaam tampi zong a laakchih.

Nov. 22,2021_CCN : November 21, Gangaw Peng Min khua Palek sakhaan in a kaimi ralhrang motor 5 cu mipi ralkap Yaw Defense Force (YDF) nih bomb 12 an rak puah hna caah 11 an thi. Cu lengah ralhrang 20 renglo hliamhma an hmu tiah YDF nih thawng a thanh.

Credit : CCNC

(RELCHAP) (Min Aung Hlaing caahcun thawngpang chia tak tak khi  asi. ASEAN nih NUG cozah cu Ralhrang nakin a zumh deuh cang timi thawng theih cu MAH caahcun thawngpang chia tak tak khi a si) ASEAN Khuacaan Kong Ceihhmainak Ah NUG Vuanci Dr. Tu Hkawng A Kai Lai.

Nov 23-25 tiang tuah dingmi ASEAN khuacaan kong ceihhmainak ah ASEAN vuanci hna he NUG vuanci Dr. Tu Hkawng zong a kai ve lai tiah NUG nih an thanh.

“Thaizing kiptuh Nov 23-25 tiang ASEAN khuacaan kong ceihhmainak cu online in tuah ding a si cang. Hi ceihhmainak ah ramkip hruaitu hna, ramkhel thiamsang hna, sianghleirun cawnpiaktu hna, khuacaan kong thiamsang hna le cozah upa an kai lai. A nikhat ni ah cozah pakhat i a pomning le ukhruaining kong (Policy and Governance Session) ceihhmainak ngeih ve dingin ASEAN vuanci hna he keimah zong an ka sawm ve. Vawleipi a ngandamnak hi ramkip hna i ukhruaining policy ah aa hngatmi a si. Cu policy hna cu khongton uknak cozah nih zeitihmanh in an kalpi kho lai lo” Dr. Tu Hkawng nih a social media ah a taar.

Tutan ASEAN khuacaan kong ceihhmainak ah hin Malaysia, Philippine, Vietnam, Brunei, Lao, Cambodia le ASEAN ram hna vuanci vialte an i tel lai. Cu ceihhmainak ah cun NUG cozah Natural Resources and Environmental Vuanci Dr. Tu Hkawng zong an sawmmi hi a si.

Dr. Tu Hkawng nih cun “Zabu 21 ah mi tampi nih an chimrel ngaimi cu kokek miphun hna ukhruainak (Indigenous framework) lawng hi pawngkam zohkhenhnak rian ah hmualngei tein tuanchuah khawhnak a si ti hi a si. Hihi vawleicung hmunkip i zohchunh ding tampi kha cherhchan in an chimmi a si. Cu ukhruainak timi cu zeidang a si lo. Federal phunglam a si ko. Feb 1 in nawlngeihnak lak a si i rammi tampi rian ngei loin an um”.

“Tuan ding a um ti lonak tikah ramlak ah an kal i thingram le kokek thil hna kha pawcawmnak ah an hman. Cu nih cun thingram le kokek thil tampi a kan sunghter. Ralhrang uknak hi a um rih a si ahcun a rauh hlanah kan thingram hna hi an lo dih lai. Cucu kan kham khawhnak dingah ramkhel a daih a hau. Democracy ram kan si lawngah rian tampi a um kho lai. Cuticun thingram le kokek thil hna hmangin pawcawmnak kha a zor lai. Myanmar lawng hi ASEAN ramchungah tikhal tlang a ngeimi kan si. Cucu ASEAN Heritage ti khawh a si. Cu bantuk thil sunglawi hna cu ralhrang hna kut ah kan ziamhral ter ding a si lo ti hi chim dingah kaa timhmi a si” tiah a chim.

Credit : The Chin Post