CDF Mindat Biachim Mi Cu An Pasal Kho Tak Tak.

CDF Mindat bia cu an pasal kho taktak. Uar an um kho taktak si. Mah tluk hin uico ralkap hna nih heh tiah hriamnam ngan he an doh lio ah hi bantuk bia an van chim kho hi cu upat awk an tlak tuk hring hran ko. CDF Mindat nih an chim mi cu uico Ralhrang nih tlaihmi an mino hna kah sual an ttih caah kan hrial chung hna, kan rak kir than lai i kan doh than lai tiah an chim hi a si.

SAC Ralkap nih Mindat Mipi Ralkhamnak ah an Hman hna caah CDF-Mindat nih an Hrial Chung Hna

Nihin zinglei sml. 7:00 hrawng in zaanlei sml. sml. 3:00 tiang SAC ralkap helicopter nih voi 30 hrawng Mindat khuachung ah ralkap le ralhriam pawl a rak chiah hna.

Khuachung i SAC ralkap hmunkhuarnak in Mindat khuami hna inn pawl cu 60mm mortar bomb in pehzul in an kah peng hna. Kyaukhtuh in motor lam in SAC ralkap pawl an rat khawh ti lo caah helicopter hmang in ralhriam le ralkap pawl an chap thluahmah hi a si.

“Khuachung i mino 15 an tlaih hna. An tlaihmi hna cu SAC ralkap nih ralkhamnak bantuk in hmai ah an kalter hna i khuachung ah an i chok. CDM a tuahmi zong pa paohpaoh cu an tlaih dih hna,” tiah Mindat mipi uktu bu nih thawngthanhnak ah an langhter.

Khuachung inn pawl ah miakpi in an kah peng caah nu le ngakchia tampi zong ramlak ah an zaam hna. “An tlaihmi minung pawl ralkhamnak ah an hman hna caah kan kah hna ahcun kanmah minung pawl kan khen hna lai ti kan phan caah CDF-Mindat nih kan hrial chung hna. Kan rak kir tthan lai i kan doh tthan hna lai,” tiah thawngthanhnak ah an langhter.

Credit : The Chin Journal