ASEAN Special Envoy To Myanmar Ah Burnai Foreign Minister-2 Thim A Si.

ASEAN Special Envoy to Myanmar Ah Burnai Foreign Minister-2 Thim a si. ASEAN nih Kawlram buainak silhnalh tu ding ah Burnai ramdang pehtlaihnak vuanci – 2 Mr. Erywan Yousof cu ASEAN nih nizaan August 3 ah tuah mi ASEAN ramdang vuanci hna meeting ah an thim.

ASEAN nih thla 3 chung an ceih hnuah Kawlram palai hi thim a si.Atu bantukin palai an thim khawh cang caah Kawlram buainak lawng si lo in Kawlram mipi nih an herh ngai mi minung zaangfah halnak zong pek khawh a si cang lai tiah ASEAN nih a chim.

Mr. Erywan Yousof hi ralhrangbu nih uknak a lak hnu Kawlram ah a tlawng bal mi a si lengah ASEAN rotating chairman Brunai ramdang pehtlaihnak vuanci- 2 nak zong a si.

ASEAN, Kawlram palai nih hin ASEAN nih Kawlram kong hnatlaknak 5 cu a taktak in a kalpi ding a si i,ralhrangbu le ramkhel cawlcangtu phu kar chawnhbiaknak a um khawhnak dingin rian a tuan ding a si.

ASEAN, Kawlram palai caah ralhrangbu nih Thailand deputy foreign minister Virasakdi Futrakul min a pek nain ASEAN nih Brunai foreign minister- 2 tu an thim.

Kawlram buainak kong ASEAN aiawh in tuanvo pek mi Erywan Yusof cu ralhrangbu zong nih kan cohlan tiah nihin August 4 ah cathanh an chuah.

ASEAN palai hi zeitik ah dah Kawlram ah a tlawn lai ti belte cu a fiang kho rih lo.Ram tampi nih ASEAN palai cu Kawlram ah zalong tein tlawnnak nawl pek ding le Kawlram kong he a pehtlaihmi ramkhel phu vialte he zalonh tein ton khawhnak ngeih dingin an nawl tiah bbc nih a tial.

Credit : The Chin Post