Lah-Wah-Kah zung pawng ah a ummi SAC Ralhrang Gate cu kan Pasaltha nih an va kah, meithal i zat hi an laak
Chaung U Lah-Wah-Kah Zung Pawng Ah A Um Mi Ralkap Gate PDF Nih An Kah Hna The Chinland Post 2023 June 5 Sagaing ramṭhen, Monywa pengkomh, Chaung U peng, Lah-Wah-Kah zung pawng ah a um mi SAC ralkap gate cu June 4 zinglei sml 7:15am hrawng ah Chaung U – PDF nih an kah hna i hriam zong an lak khawh tiah theih a si. Chaung U khuami pakhat nih
“Chaung U in Mandalay lei kalnak lam, zinglei sml 7:15am ah an gate cu an lak khawh. SAC chungtel 4 lawng an um. SAC lei he PDF lei he hliam a tuar mi le a thi mi an um lo. An zaam dih caah PDF pawl nih hriam an lak khawh” tiah Irrawaddy Burmese ah a chim. NUG thawngzamh thlahnak PVTV nih cun cuka hmun kahdohnak kong he pehtlai in
SAC ralkap 4 an thi i hriam zuun 4 le kuanzen pawl an lak khawh tiah Monwya pengkomh, Chuang U peng Battalion 8 thanh mi charhchan in a langhter. Cu SAC ralkap pawl cu Monywa pengkomh, Chaung U peng hrambunh B08 hriamtlai Kyaw Win Thu hruai mi phu nih an kah hna hi a si i SAC ralkap 4 an thi, G3 zuun 4, kuanbawm 4 le kuan fang 49 an lak khawh tiah cathanh chung ah an langhter.
Hakha-Thantlang Karlak Ah Kahdohnak Pehzulh In A Chuak, Drone In SAC Ralkap 7 An Thah Hna The Chinland Post 2023 June 5 Chin ramkulh, Hakha le Thantlang karlak ah SAC ralkap le CNA, CDF karlak ah pehzulh in kahdohnak a chuak tiah CNA biachimnak nawl a ngeitu Salai Htet Ni nih People’s Spring ah a chim. “June 4 chun sml 12:00pm hrawng ah kan hmunhma lei ah voi 3 an rak kai. Vawlei lei Operation tiah chim khawh a si. Vanlawng bel a ra lo. An rak kai lio ah anmah lei 7 an thi. Vawlei lei kha naih tein
kan kah hna i Drone in bom kan thlak hnawh hna. Hmai an rak fong kho ti lo. June 3 bel ahcun vanlawng in voi 8 bom a rak thlak” tiah a chim. Vanlei in bom a rak thlak ruang ah Mipi hriamtlai lei thinphan awk um tuk lo in aa hliam mi an um tiah a chim. June 3 kahdohnak zong ah SAC ralkap a thi mi an um tiah a chim. June 3 zong ah
kan doh ve hna. A naih tein kan doh hna. Culio kahdohnak ah anmah lei a tlawmbik 10 hrawng an i hliam tiah kahdohnak hmunhma in thawng kan theih” tiah Salai Htet Ni nih a chim. SAC ralkap pawl cu Hakha-Thantlang karlak ah thazang 150 leng in phu 2 an i ṭhen i May 29 thawk in kahdohnak a fak. “Phu nih in an rak kan doh. Timit a cunglei a kai mi phu pawl hi June 4 kha kahdohnak a um lo. Timit tanglei bel ah kahdohnak a fak. A biapi in Hakha le Thantlang karlak kan ti ko nain
Hakha peng chung deuh hi a si” tiah Salai Htet Ni nih a chim. SAC nih May 29 hlan deuh ah cuka hmunhma pawl ah vanlawng in bom a rak thlak hmasa. Cu hnu ah vawlei lei in kahdohnak an pehzulh caah CNA, CDF he kahdohnak nifatin in a fak. Kahdohnak a nikhatnak ni ah hriamtlai 11 an nunnak a rak liam. SAC ralkap lei zong a thi mi an tam cang i 50 nak tlawm lo an thi cang lai tiah CNA biachimnak nawl a ngeitu Salai Htet Ni nih a chim tiah People’s Spring nih a langhter.