Thawng fiang taktak: Hakha-Thantlang Karlak Ah Kahdohnak Pehzulh In A Chuak, Drone In SAC Ralkap 7 An Thah Hna
Hakha-Thantlang Karlak Ah Kahdohnak Pehzulh In A Chuak, Drone In SAC Ralkap 7 An Thah Hna The Chinland Post 2023 June 5 Chin ramkulh, Hakha le Thantlang karlak ah SAC ralkap le CNA, CDF karlak ah pehzulh in kahdohnak a chuak tiah CNA biachimnak nawl a ngeitu Salai Htet Ni nih People’s Spring ah a chim. “June 4 chun sml 12:00pm hrawng ah
kan hmunhma lei ah voi 3 an rak kai. Vawlei lei Operation tiah chim khawh a si. Vanlawng bel a ra lo. An rak kai lio ah anmah lei 7 an thi. Vawlei lei kha naih tein kan kah hna i Drone in bom kan thlak hnawh hna. Hmai an rak fong kho ti lo. June 3 bel ahcun vanlawng in voi 8 bom a rak thlak” tiah a chim. Vanlei in bom a rak thlak ruang ah Mipi hriamtlai lei thinphan awk um tuk lo in aa hliam mi an um tiah a chim. June 3 kahdohnak zong ah SAC ralkap a thi mi an um tiah a chim. June 3 zong ah
kan doh ve hna. A naih tein kan doh hna. Culio kahdohnak ah anmah lei a tlawmbik 10 hrawng an i hliam tiah kahdohnak hmunhma in thawng kan theih” tiah Salai Htet Ni nih a chim. SAC ralkap pawl cu Hakha-Thantlang karlak ah thazang 150 leng in phu 2 an i ṭhen i May 29 thawk in kahdohnak a fak. “Phu nih in an rak kan doh. Timit a cunglei a kai mi phu pawl hi June 4 kha kahdohnak a um lo. Timit tanglei bel ah kahdohnak a fak. A biapi in Hakha le Thantlang karlak kan ti ko nain Hakha peng chung deuh hi a si” tiah Salai Htet Ni nih a chim.
SAC nih May 29 hlan deuh ah cuka hmunhma pawl ah vanlawng in bom a rak thlak hmasa. Cu hnu ah vawlei lei in kahdohnak an pehzulh caah CNA, CDF he kahdohnak nifatin in a fak. Kahdohnak a nikhatnak ni ah hriamtlai 11 an nunnak a rak liam. SAC ralkap lei zong a thi mi an tam cang i 50 nak tlawm lo an thi cang lai tiah CNA biachimnak nawl a ngeitu Salai Htet Ni nih a chim tiah People’s Spring nih a langhter.
Mindat Kahdohnak Ah SAC Ralkap 5 An Thi, Mipi Hriamtlai Kah Mi Hriamngan Nih Ralkap Hriam Chiahnak A Hrawh The Chinland Post 2023 June 5 Chin ramkulh, Mindat peng ah rian hmunhma thlennak a tuah lio mi SAC ralkap an kah hna i SAC Ralkap 5 an thi tiah CDF-Mindat nih a thanh. May 28 ah rian hmunhma thlennak a tuah lio mi
SAC ralkap pawl bomrap an puah hnawh hna i SAC ralkap tampi an i hliam, May 29 chun sml 2:30pm hrawng zong ah 20 Meters tluk aa naihnak in an kah hna i SAC ralkap 5 an thi, CDF-Mindat hriamtlai 1 aa hliam tiah theih a si. Cun May 30 zinglei sml 7:00am hrawng ah Magway ramṭhen, Kyaukhtu khua lei in a rak ṭum mi SAC ralkap pawl CDF-Mindat nih an doh hna, SAC ralkap nih hriam an chiahnak sakhaan cu Rocket Missile in an kah i sakhaan a rawk tiah an thanh.