A poi tuk e: SAC Ralhrang nih kan Pasaltha hna Camp pakhat an luh hnawh i an kah ti theih a si

Myan-Aung Peng Mipi Ralkap Hna Sakhan Pakhat SAC Ralhrang Nih Luhhnawh In An Kah Lungmili Post  Pur, 4  2023. Ayeyarwady ramṭhen, Myan-aung peng mipi ralkap hna umnak sakhan pakhat cu SAC ral hrang nih luhhnawh in an kah hna nain mipi ralkap hna cu a himnak hmun an phan kho dih, tiah theih a si, “Myan-aung peng, Banbwegon khua pawng um

mipi ralkap hna an sakhan pakhat cu SAC ralhrang le palik fonh nih June 2 zing ah an luhhnawh hna hi a si. Ralhrang nih an luhhnawh hna hlan in thawng an theih caah an hrial manh hna nain thilri le sakhan tu cu an khangh dih, minung kan him a biapi ko i, thinlung der in lungrawhtuk ding a si lo” tiah June 4 ah tualchung mipi

ralkap pakhat nih People’s Spring ah a chim. Sakhan ah ummi kan serchuahmi hna meithal le bomb pawl, hriam kan serchuahnak seh thilri le hriamthil pawl dih lak zong SAC ralhrang nih an laak dih, tiah theih a si.

Bago Ramṭhen, Mu Peng Ah SAC Ralkap Hna Cawlcanghnak Ruangah Tualchung Mi 30,000 Leng An Zaam Cang! The Chin Post  4 Jun 2023 Karen ramkulh, KNU Brigade 3 hmunram, Bago ramṭhen, Nyaunglaypin pengkomh Mu peng ah SAC ralkap hna cawlcanghnak ruangah tualchung mi 32,000 leng ralhrial in an zaam cang, tiah KNU Central nih June 3 ah an thanh. SAC ralkap Khah Mah Yah 590 nih, Midaingtaw khua le Aungchantha khua ah a luancia May 29 lio ah khan hriamngan an kah pinah

May 30 ah Thasi khua le Kyiattat Nyuangpin khua cu hriamngan lung 10 nak tlawm loin an kah, tiah an langhter. SAC ralkap hriamngam kah ruangah Thasi khua telh in khuate 5 in khuami 4,200 leng cu a himnak hmun ah an zaam hna, tiah theih a si. SAC ralkap nih Mu peng i kahdohnak an tuah ruangah May 10 tiang ah ralhrial in a zaammi 28,000 leng an phan cang i atu hi minung 4,000 leng an karh ṭhan, tiah KNU Central nih cun an thanh. Ralhrial in a zaammi tualchung mi hna cu

ruahkham muka, eidin le sii-ai an herh tuk. Kan si khawh chung in kan zohkhenh hna i, anmah bawmchan ding in ramdang mi bawmtu phu hna sin zong ah nawlnak kan tuahpiak hna, tiah KNU Central chungtel pakhat Padoh Saw Kale Se nih a chim. SAC ralkap nih nawlngeihnak an laak hnu in tanglei in kahdohnak an tuahmi le vanlawng in kahdohnak an tuah ruangah KNU hmunram chung ah ralhrial in a zaam mi cu minung sing li leng an phan cang, tiah theih a si.