Ralhrang hi zat an thi tthan: Ni 12 chung kahdohnak ah kan Pasaltha hna nih SAC Ralhrang tampi an thah hna, hriamnam hi zat an laak khawh

Pekon Peng Ni 12 Chung Kahdohnak Ah SAC Lei 19 An Thi, Hriam Cheukhat Zong An Lak Khawh The Chinland Post 2023 June 2  Shan-Kayah (Karenni) ramri, Pekon peng kahdohnak ah SAC ralkap 19 an thi i hriam zong an lak khawh tiah Demoso PDF No. 1102 nih June 1 ah an thanh. SAC ralkap a za in an rak luh caah Pekon peng, Lwailone, Kaung-ih, Latu le Setdawyar khuate hna ah

May 20 thawk in kahdohnak fah hram aa thawk hi a si tiah an langhter. “A nikhatnak ni kahdohnak a chuah dih hnu in hmunhma zohfelnak kan ngeih lio ah ralkap ruak 12 le kuanzen cheukhat, Drone pawl zong kan lak khawh” tiah an ṭial. May 20 in May 31 tiang ni 12 chung ah kahdohnak a tlawmbik voi 6 a chuak tiah theih a si. SAC nih

thazang a za in an kan doh. Cu leng ah vanlei zong nih kahdohnak a bawmh hna. Atutiang kahdohnak a um peng rih” tiah an langhter fawn. Kahdohnak chung ah SAC ralkap 19 hrawng an thi i mipi hriamtlai phufonh lei in 4 an i hliam tiah cathanh chung ah an langhter.

Chin Ramkulh Ah Sianginn 300 Leng An Awn I A Kai Mi 35,000 Leng An Um The Chinland Post.  2023 June 2 Myanmar ram pumpi ah June 1 thawk in SAC nih sianginn a awn ṭhan i kahdoh a fahnak Chin ramkulh zong ah sianginn 300 leng an awn khawh i a kai mi siahngakchia 35,000 leng an um tiah Chin ramkulh fim cawnnak bawi nih a chim tiah Khonumthung Burmese nih a langhter. Peng 9 a umnak Chin ramkulh chung ah Thantlang khua dah ti lo adang peng 8 ahcun June 1 thawk in sianginn 328 an awn khawh i siahngakchia 35,434 an kai tiah an langhter. Tutan cacawn kum hi hramhram in uknak lak a si hnu kum 2 chung Chin ramkulh ah, SAC kuttang ah

sianginn an awn khawh mi a tambik kum le siahngakchia a kai mi an tambik kum a si tiah theih a si. Ramkhel buainak ruang ah fale hna sianginn an kai khawh lo nak hi kum 3 leng a rau cang i hngakchia hna an hmailei ca ruah ah lungretheih a si caah SAC kuttang ah kan duh lo bu in sianginn kan apnak hna hi a si tiah khuami pakhat nih Khonumthung ah a chim. “Tukum hi sianginn a ap mi an tam. Abik cu fale sianginn an kai ti lo nak hi kum 3 a si cang. Ka fa hi kum 8 a si cang nain KG zong a kai rih lo. A kum lawng upa i, sianginn kai hlah kaw phone lawngte a tuai. Cutikah midang fale hna an kaiter hna i ka fale an kai lo ahcun hnu an taang lai. Kamkhat lei ah

SAC kuttang ah sianginn kaiter kan duh hna lo nain khuapi chung ahcun NUG nih a dirh mi sianginn zong a um lo, private sianginn kaiter ding ti ah le thlakhat ah sing 1 leng a si caah kan kaiter kho hna lai lo. SAC kuttang sianginn ap lawng hi a tang cang” tiah a chim. Tukum, Chin ramkulh chung ah Paletwa peng hi sianginn a kai mi an tambik i siahngakchia 17,322 an kai tiah theih a si. Peng kip sianginn a kai mi cazin hna cu Hakha peng ah siahngakchia 2,182, Falam peng ah siahngakchia 2,706, Tedim peng ah siahngakchia 4,840, Tonzang peng ah siahngakchia 5,966, Mindat peng ah 1,506, Kanpetlet peng ah siahngakchia 142 le Matupi peng ah

siahngakchia 760 hna sianginn an kai tiah Chin ramkulh fimcawnnak zung cazin in theih khawh a si. SAC ralkap nih khuapi ning in an khanghnak Thantlang peng ahcun sianginn an awng kho lo. Chin ramkulh hi Myanmar ramchung ah CDM a ṭhawn bik nak hmunhma a si caah chimnak kong ah harnak tampi a um lai tiah Hakha khuami nih Khonumthung Burmese ah a chim. “Atu bantuk in sianginn an awn ko nain siangcachim an i tingzo lai lo. Cachimhnak lei a chanbau ngai lai. Asinain hngakchia pawl hi

sianginn an kai lo nak kum 3 a rauh cang caah an tlai ngai cang. Inn ah phone tuai lengmang nak in cun ca cheu 10 ah cheu 1 tel an theih mi hi a ṭhahnem, Private sianginn ah kan kaiter kho hna lo, tangka a um lo ahcun cozah sianginn ah kaiter an hau ko” tiah a chim. Chin ramkulh chung ah sianginn 1,516 a um mi chung ah sianginn 328 lawng an awn khawh i siangcachim 9,667 hrawng an um ko nain 4,000 leng nih CDM an tuah caah cachimhnak lei a chanbau ngai lai tiah theih a si.