Thawngpangttha Taktak: Hakha khuachung ah tukum Sianginn kai mi an tam taktak, minung hi zat bak an si cang

Chin Ramkulh Ah Sianginn 300 Leng An Awn I A Kai Mi 35,000 Leng An Um The Chinland Post  2023 June 2 Myanmar ram pumpi ah June 1 thawk in SAC nih sianginn a awn ṭhan i kahdoh a fahnak Chin ramkulh zong ah sianginn 300 leng an awn khawh i a kai mi siahngakchia 35,000 leng an um tiah Chin ramkulh fim cawnnak bawi nih a chim tiah Khonumthung Burmese nih a langhter. Peng 9 a umnak Chin ramkulh chung ah Thantlang khua dah ti lo adang peng 8 ahcun June 1 thawk in sianginn 328 an awn khawh i siahngakchia 35,434 an kai tiah an langhter. Tutan cacawn kum hi hramhram in uknak lak a si hnu kum 2 chung Chin ramkulh ah, SAC kuttang ah

sianginn an awn khawh mi a tambik kum le siahngakchia a kai mi an tambik kum a si tiah theih a si. Ramkhel buainak ruang ah fale hna sianginn an kai khawh lo nak hi kum 3 leng a rau cang i hngakchia hna an hmailei ca ruah ah lungretheih a si caah SAC kuttang ah kan duh lo bu in sianginn kan apnak hna hi a si tiah khuami pakhat nih Khonumthung ah a chim. “Tukum hi sianginn a ap mi an tam. Abik cu fale sianginn an kai ti lo nak hi kum 3 a si cang. Ka fa hi kum 8 a si cang nain KG zong a kai rih lo. A kum lawng upa i, sianginn kai hlah kaw phone lawngte a tuai. Cutikah midang fale hna an kaiter hna i ka fale an kai lo ahcun hnu an taang lai. Kamkhat lei ah

SAC kuttang ah sianginn kaiter kan duh hna lo nain khuapi chung ahcun NUG nih a dirh mi sianginn zong a um lo, private sianginn kaiter ding ti ah le thlakhat ah sing 1 leng a si caah kan kaiter kho hna lai lo. SAC kuttang sianginn ap lawng hi a tang cang” tiah a chim. Tukum, Chin ramkulh chung ah Paletwa peng hi sianginn a kai mi an tambik i siahngakchia 17,322 an kai tiah theih a si. Peng kip sianginn a kai mi cazin hna cu Hakha peng ah siahngakchia 2,182, Falam peng ah siahngakchia 2,706, Tedim peng ah

siahngakchia 4,840, Tonzang peng ah siahngakchia 5,966, Mindat peng ah 1,506, Kanpetlet peng ah siahngakchia 142 le Matupi peng ah siahngakchia 760 hna sianginn an kai tiah Chin ramkulh fimcawnnak zung cazin in theih khawh a si. SAC ralkap nih khuapi ning in an khanghnak Thantlang peng ahcun sianginn an awng kho lo. Chin ramkulh hi Myanmar ramchung ah CDM a ṭhawn bik nak hmunhma a si caah chimnak kong ah harnak tampi a um lai tiah Hakha khuami nih Khonumthung Burmese ah a chim. “Atu bantuk in sianginn an awn ko nain

siangcachim an i tingzo lai lo. Cachimhnak lei a chanbau ngai lai. Asinain hngakchia pawl hi sianginn an kai lo nak kum 3 a rauh cang caah an tlai ngai cang. Inn ah phone tuai lengmang nak in cun ca cheu 10 ah cheu 1 tel an theih mi hi a ṭhahnem, Private sianginn ah kan kaiter kho hna lo, tangka a um lo ahcun cozah sianginn ah kaiter an hau ko” tiah a chim. Chin ramkulh chung ah sianginn 1,516 a um mi chung ah sianginn 328 lawng an awn khawh i siangcachim 9,667 hrawng an um ko nain 4,000 leng nih CDM an tuah caah cachimhnak lei a chanbau ngai lai tiah theih a si.

Dawei Peng SAC Ralkap Motor Bomb Puahhnawhnak Ah Ralkap 10 An Thi The Chin Post 2 June 2023 Tanintharyi ramṭhen, Dawei peng ah SAC ralkap motor bomb puahhnawhnak ah SAC ralkap 10 an thi, tiah Dawei PDF in ṭuanvo ngeitu pakhat nih Khit Thit Media ah a chim. May 31 zanlei suimilam 4:55 ah Dawei peng Kalingaung in Yephyu lei ah

a kalmi SAC ralkap motor 4 le Honda Fit motor 1 cu bomb lung 30 in PDF nih an puahhnawh hna. Bomb an puahhnawh hna hnu in kahdohnak minutes 15 hrawng a chuak. Motor mawngtu pakhat le motor pakhat cu meithal kuan nih a khen hna caah motor cu a taap. Hliamhma pumi hna cu Hijet motor 3 le Emergency motor 2 nih an laak hna, tiah Khit Thit Media nih a ṭial. Tualchung mi hna nih hliamhma pumi SAC ralkap pawl cu motor in an laak hna i, 407 Battalion lei ah an kalpi hna. Kahdohnak hmun pawngkam vialte cu sentari an cawngh dih. Hnakye khua lei a kalmi pa pakhat zong SAC ralkap nih an thah, tiah an chim.