Thlichia A Hran Ruangah Nunnak A Liammi Cu 522 An Phan Cang!
Thlichia A Hran Ruangah Nunnak A Liammi Cu 522 An Phan Cang!
Malawi Ram Ah Zarhkhat Chung Thlichia A Hran Ruangah Nunnak A Liammi Cu 522 An Phan Cang!
Africa chaklei ah a ummi, Malawi ram ah zarhkhat chung thlichia(cyclone) a hran ruangah nunnak a liammi cu minung 522 an phan cang i, minung sing 5 hrawng cu thlichia ruangah harnak an tong cuahmah. United Nations for the Coordination of Humanitarian Affairs(OCHA) nih cun minung nuai 1 le thong 80 leng cu a himnak hmun ah thial an hau, tiah a langhter.
Fak ngai in ni ruk chung ruahpi a sur caah Malawi ram thlanglei cinthlaknak hmunram hna cu an rawk i, lampi le innlo tam ngai an rawk. Thlichia nih a hrawh mi report thar a luh peng caah nunnak a liam mi hi an karh lai, tiah zumh a si.
Malawi president Lazarus Chakwera zong nih rawhralnak a cannak hmun hna cu a va zoh cang hna.World Food Programme(WFP) director, Paul Turbull nih cun, “Malawi ram nih bawmhnak an herh tuk hringhran, ramkip hna nih nan kut rak samh cio u,” tiah nawlnak a tuah.
Thlichia ruangah ngakchia nuai 2.8 hrawng cu bawmh hau in an um, tiah UNICEF nih an langhter ve. Thlichia tuartu hna caah cozah nih buk 300 hrawng a sak i, palik le ralkap nih nunnak a liammi hna ruak an kawl cuahmah lio, tiah ramchung thawngzamhtu hna nih an langhter.Thechinpost