Kalay Khi Chinram Khawlipi Asi Khawh ahcun Kan khua”, “Kan khualipi”, tiah aho paoh nih lungtling tein kan ti khawh hnga!
Kalay Khi Chinram Khawlipi Asi Khawh ahcun Kan khua”, “Kan khualipi”, tiah aho paoh nih lungtling tein kan ti khawh hnga!
Ruah-chukcho – Dohthlennak tuah ah hin kan inn le kan lo a rawk ko lai. Kan thisen a chuak ko lai; kan nunnak a liam ko lai.A tlawm le a tam lawng khi a si lai. Mah vialte ton kan duh lo ahcun ngol colh a hau ko hnga.Thlantlang khua cu a ciam dih ti awkin a um, Khuami zong an zaam dih.
Mah vialte an ton ah hin Thlantlang khuami an zainak le an aukhuannak ka hmu bak lo, keimah hmuh khawh tawk ah.Kan Chin ralkap hna thangchiatnak le thazaang dernak pakhat hmanh an chim ka thei rih lo. Kan miphun ralkap he zei paoh kan tuarți lai timi lungput an ngei tiah ka hmuh.
Cawn awktlak taktak a si!Thlantlang bantukin Chinram khua dang vialte an ciamh dih ding a si, an ciamh dih zongah a poi lo ti duhnak cu a si fawn lo. Kan ralkap hna nih an doh ningcang (strategy) zong a țha/a chia ka ti lo.A biapimi cu i dirpi le i ttanpi kha a si ko rua.Chin miphun hi Tlang holh kong le Khualipi kong nih hin a kan țhen bik ko rua ka ti.
Mah le holh, mah le khua cio kha fak tuk in kan ttanh cio tikah zei dang țhanchonak vialte a kan dawnh dih. Miphun dang, a hleiin Kawl nih an kan nihsawh tuk.Atu tiang ah kan tlang holh cu Kawl holh hi duh zong duh lo zongah a si rih ko. Hmailei ah cun Mirang holh zong khi a si kho te ko.
Khualipi hi Kalay tu ah khin țhial te dingin i tinh u si law a țha ngai lai dah. Chin miphun kan tling bik lai. Hmun rawn a si caah International Level in a ngan khomi le a țhang khomi Khuapi a si.Kalay kan khualipi a si ahcun buainak zong a um theng ti lai lo, “Ka khua” a si tiah ahohmanh nih an ti kho ti lai lo.
“Kan khua”, “Kan khualipi”, tiah aho paoh nih lungtling tein kan ti khawh hnga.Kalay hi Chinram khualipi a sinak ding ah cun a pawngkam, Kalay-Kabaw-Gangaw (KKG) khi kan lak le kan kilven khawh hrimhrim a hau ve hnga.
Har cu a har taktak lai nain kan i funtom khawhnak bik lam a si men lai. Dohthlennak zongah lungrualnak le thazaang a kan petu bik a si kho men. Salai Cunglian