Kawthoung in phungning loin a lutmi hngakchia 2 telh in Myanmar rammi 20 an tlaih hna
Kawthoung in phungning loin a lutmi hngakchia 2 telh in Myanmar rammi 20 an tlaih hna
Thai ram thlanglei, Ranong pengkomh ah Kawthoung khua in phungning loin a rak lutmi hngakchia 3 telh in Myanmar rammi 20 an tlaih hna tiah theih a si.
Ranong pengkomh ah mawṭaw pakhat nih Myanmar rammi pawl phungning loin a phorh hna tiah September 20 ah thawng an theih caah Suksaran gate ah Thai Special Force in an hngah hna.
Cun September 20 zinglei sml 2 hrawngah Phang-Nga pengkomh Khura Buri lei ah a kalmi mawṭaw cu rianngeitu hna nih an check i phunglut lo Myanmar rammi 20 an tlaih hna tiah theih a si.
An tlaih mi hna chungah hngakchia pa pathum, pa 10, nu 2 le Thai rammi mawṭaw mawngtu pakhat hna an si tiah theih a si.
Myanmar rammi hna cu Kawthoung in Ranong ah phungning loin an rak lut i minung pakhat nih Thai baht 2,2000 (sing 20) hrawng an dih tiah theih a si.
Mawṭaw mawngtu pa nih Suksaran in an i tinhnak hmunhma tiang an phorh hna lai i baht 3,000 a ngah lai tiah an thanh.
Relchap: Myanmar ram ah Covid mizaw thar 400 hrawng an hmuh hna, 2 an thi chap
Myanmar ram nikhat chungah Covid-19 mizaw thar 400 deng an hmuh chap hna tiah SAC kuttang ngandamnak zung nih September 11 zaanlei ah a thanh.
A luancia sml 24 chung ah Laboratory sample 12,102 an check lioah mizaw thar 399 an hmuhmi a si i zawtnak rungrul an hmuhmi hi 3.30% a si.
Covid-19 zawtnak in a thi chap mi 2 an um caah Covid-19 in a thi cangmi minung 19,450 an si tiah a thanh.
Myanmar ram pumpi in Covid-19 zawtnak aa chawnhmi 619,566 an um i zawtnak in a dam cangmi 595,848 an si tiah cathanh ah a telh chih.
Asinain a cunglei thanhmi hi CDM sizung pawl, CDM Laboratory ah check mi aa tel loin SAC kuttang ralkap sizung lawngah check mi a si caah zawtnak i chawnhnak le a thimi he pehtlai in a fiangmi cazin theih a si lo.
NUG kuttang ngandamnak zung nih cun Covid-19 zawtnak thar hi a zarh chung te ah vawlei pumpi ning in a karh tiah WHO cathanh charhchan in thawng a thanh ve.
SAC kuttang ngandamnak zung nih Covid-19 zawtnak i chawnh le a thimi cazin nifatin a thanh kha hmuh khawh a si i atulio caan hi i chawnhnak 1% hmanh a um ti lo i a thimi an um lonak ni zong a um tiah a chim.
Cu lengah, Myanmar ram ah Covid-19 mizaw thar an tlawm tuk cang le a thimi an um tuk ti lo caah Marh 16 thok in minung 400 tiang i but khawh a si cang tiah SAC ngandamnak zung nih a rak thanh.
Myanmar ram ah hramhram in uknak lak a si hnu kum 1 le cheu leng caan chungah ram buainak, sipuazi, zatlang nun le mipi ngandamnak i zohkhenhnak a lamkip in a ṭumchuk.
NUG nih a thanhmi Covid-19 zawtnak he aa pehtlai mi cathanh ahcun sizung kai ding a si ko nain a kai kho lomi, online i aa thlopmi, SAC nih a thimi cazin dik tein a thanh lo caah SAC nih Covid-19 zawtnak a tawlrel dan hi a ṭha lo tuk tiah a chim.
Cucaah mipi hna nih Covid-19 khamhnak sii i chunh hrimhrim ding le Covid-19 he pehtlai in zulhpung vialte pehzulh rih ding a biapi tiah NUG nih forhfialnak a tuah.Thechinlandpost